«Egemen Qazaqstan» gazetiniń 100 jyldyǵyna orai L.Gýmilev atyndaǵy Eýraziia ulttyq ýniversitetinde «Jahandyq mediasaladaǵy basylymnyń róli men damý tendentsiiasy» atty halyqaralyq ǵylymi-praktikalyq konferentsiia ótip jatyr, dep habarlaidy QazAqparat.
Jiynǵa el gazetinde eńbek etken ardagerler – elge belgili qalamgerler men tarihshylar qatysýda. Konferentsiiada sóz bastaǵan «Egemen Qazaqstan» gazetiniń basqarma tóraǵasy Darhan Qydyráli búgingi shara toi toilaý úshin emes, oi oilaý úshin, taǵylym men taǵzymǵa toly sipatta uiymdastyrylyp otyrǵanyn atap ótti.
«Negizinen biz «Egemen Qazaqstan» gazetiniń 100 jyldyǵyn el gazetinde eńbek etken Alash qairatkerleriniń mereitoilarymen ushtastyryp otyrmyz. Qaraǵandydaǵy Egemen-niń kezdesýin Sáken Seifýllinniń 125 jyldyǵymen ushtastyrdyq. Qostanaida Beiimbet Mailinniń 125 jyldyǵymen orailastyrdyq. Sol siiaqty bizdiń mereitoiymyz Iliias Jansúgirovtyń 125 jyldyǵymen de sabaqtasa ótti. Ońtústikte Turar Rysqulovtyń 125 jyldyǵyna orai arnaiy shara ótkizdik. Batystaǵy Bókei ordasyna arnaiy ekspeditsiia uiymdastyryldy. Basqa da sharalarymyzdy Egemen Qazaqstan-da - Eńbekshi qazaqta – Ushqynda qyzmet etken qairatkerlerdiń esimderimen bailanystyrýǵa tyrystyq», - dedi Darhan Qydyráli.
«Egemen Qazaqstan» gazetiniń basqarma tóraǵasy óz sózinde Almatyda jýyrda úlken shara ótkizilip, onda «Egemen Qazaqstan» gazetiniń redaktsiiasy ornalasqan, egemendikti elge súiinshilegen, Ábish Kekilbaev pen Sherhan Murtaza qyzmet etken úlken ǵimaratqa eskertkish taqta ornatylǵanyn aityp ótti.
«Kezinde Egemende qyzmet atqarǵan, dúnieden ótken barlyq aǵalarymyzǵa arnap, úlken as berdik. Oǵan Ábdijámil Nurpeiisovten bastap, búkil oqyrmandarymyz, turaqty avtorlarymyz, ardagerlerimiz qatysty. Kórme uiymdastyryldy. Kúni keshe Taraz jerinde taǵylymdy shara ótti. Biraq, búgingi jiynnyń mán-maǵynasy erekshe. Sebebi, birinshiden bul jerde (L.Gýmilev atyndaǵy EUÝ) bizdiń ardager aǵalarymyz eńbek etedi. Serik aǵamyzdyń (Qirabaev) el gazetinde qyzmet atqarǵanyn bilesizder. Sol sekildi bizdiń basylymda Qoishyǵara aǵamyz tilshi bolǵan. Ómirden ozyp ketken Aqań da (Aqseleý Seidimbek) «Egemen Qazaqstan» gazetiniń bólimin basqarǵan. Sol sekildi kóp aǵalarymyz gazette qyzmet etti», - dedi ol.
Darhan Qydyráli, «Egemen Qazaqstan» gazetiniń L.Gýmilev atyndaǵy EUÝ-dyń jýrnalistika fakýltetimen tikelei bailanysty ekenin atap ótti.
«Bizde osy fakýltettiń 13 túlegi qyzmet etip jatyr. Qazirgi tańda gazet qyzmetkerleri edáýir jasarǵan. Bizde qazir ortasha jas – 30. Sondyqtan, stýdentterdiń kóbi bizde praktikadan ótedi. Sonymen qatar, biz ózimizge kadr daiarlaý maqsatynda «Egemen akademiia» degen atty stýdentterge arnaiy dáris uiymdastyrǵan bolatynbyz. Onyń turaqty qatysýshylary – osy Eýraziia ulttyq ýniversitetiniń stýdentteri», - dedi Darhan Qydyráli.
Konferentsiia barysynda Darhan Qydyráli «Egemen Qazaqstan» gazetiniń 100 jyldyǵyna orai ǵalym Serik Qirabaevqa, jazýshy, tarihshy Qoishyǵara Salǵaraulyna arnaiy merekelik medal tabys etti.
