«Egemen Qazaqstan» گازەتٸنٸڭ 100 جىلدىعىنا وراي ل.گۋميلەۆ اتىنداعى ەۋرازييا ۇلتتىق ۋنيۆەرسيتەتٸندە «جاھاندىق مەدياسالاداعى باسىلىمنىڭ رٶلٸ مەن دامۋ تەندەنتسيياسى» اتتى حالىقارالىق عىلىمي-پراكتيكالىق كونفەرەنتسييا ٶتٸپ جاتىر, دەپ حابارلايدى قازاقپارات.
جيىنعا ەل گازەتٸندە ەڭبەك ەتكەن ارداگەرلەر – ەلگە بەلگٸلٸ قالامگەرلەر مەن تاريحشىلار قاتىسۋدا. كونفەرەنتسييادا سٶز باستاعان «ەگەمەن قازاقستان» گازەتٸنٸڭ باسقارما تٶراعاسى دارحان قىدىرەلٸ بٷگٸنگٸ شارا توي تويلاۋ ٷشٸن ەمەس, وي ويلاۋ ٷشٸن, تاعىلىم مەن تاعزىمعا تولى سيپاتتا ۇيىمداستىرىلىپ وتىرعانىن اتاپ ٶتتٸ.
«نەگٸزٸنەن بٸز «Egemen Qazaqstan» گازەتٸنٸڭ 100 جىلدىعىن ەل گازەتٸندە ەڭبەك ەتكەن الاش قايراتكەرلەرٸنٸڭ مەرەيتويلارىمەن ۇشتاستىرىپ وتىرمىز. قاراعاندىداعى Egemen-نٸڭ كەزدەسۋٸن سەكەن سەيفۋلليننٸڭ 125 جىلدىعىمەن ۇشتاستىردىق. قوستانايدا بەيٸمبەت مايليننٸڭ 125 جىلدىعىمەن ورايلاستىردىق. سول سيياقتى بٸزدٸڭ مەرەيتويىمىز ٸليياس جانسٷگٸروۆتىڭ 125 جىلدىعىمەن دە ساباقتاسا ٶتتٸ. وڭتٷستٸكتە تۇرار رىسقۇلوۆتىڭ 125 جىلدىعىنا وراي ارنايى شارا ٶتكٸزدٸك. باتىستاعى بٶكەي ورداسىنا ارنايى ەكسپەديتسييا ۇيىمداستىرىلدى. باسقا دا شارالارىمىزدى Egemen Qazaqstan-دا - ەڭبەكشٸ قازاقتا – ۇشقىندا قىزمەت ەتكەن قايراتكەرلەردٸڭ ەسٸمدەرٸمەن بايلانىستىرۋعا تىرىستىق», - دەدٸ دارحان قىدىرەلٸ.
«ەگەمەن قازاقستان» گازەتٸنٸڭ باسقارما تٶراعاسى ٶز سٶزٸندە الماتىدا جۋىردا ٷلكەن شارا ٶتكٸزٸلٸپ, وندا «Egemen Qazaqstan» گازەتٸنٸڭ رەداكتسيياسى ورنالاسقان, ەگەمەندٸكتٸ ەلگە سٷيٸنشٸلەگەن, ەبٸش كەكٸلباەۆ پەن شەرحان مۇرتازا قىزمەت ەتكەن ٷلكەن عيماراتقا ەسكەرتكٸش تاقتا ورناتىلعانىن ايتىپ ٶتتٸ.
«كەزٸندە ەگەمەندە قىزمەت اتقارعان, دٷنيەدەن ٶتكەن بارلىق اعالارىمىزعا ارناپ, ٷلكەن اس بەردٸك. وعان ەبدٸجەمٸل نۇرپەيٸسوۆتەن باستاپ, بٷكٸل وقىرماندارىمىز, تۇراقتى اۆتورلارىمىز, ارداگەرلەرٸمٸز قاتىستى. كٶرمە ۇيىمداستىرىلدى. كٷنٸ كەشە تاراز جەرٸندە تاعىلىمدى شارا ٶتتٸ. بٸراق, بٷگٸنگٸ جيىننىڭ مەن-ماعىناسى ەرەكشە. سەبەبٸ, بٸرٸنشٸدەن بۇل جەردە (ل.گۋميلەۆ اتىنداعى ەۇۋ) بٸزدٸڭ ارداگەر اعالارىمىز ەڭبەك ەتەدٸ. سەرٸك اعامىزدىڭ (قيراباەۆ) ەل گازەتٸندە قىزمەت اتقارعانىن بٸلەسٸزدەر. سول سەكٸلدٸ بٸزدٸڭ باسىلىمدا قويشىعارا اعامىز تٸلشٸ بولعان. ٶمٸردەن وزىپ كەتكەن اقاڭ دا (اقسەلەۋ سەيدٸمبەك) «Egemen Qazaqstan» گازەتٸنٸڭ بٶلٸمٸن باسقارعان. سول سەكٸلدٸ كٶپ اعالارىمىز گازەتتە قىزمەت ەتتٸ», - دەدٸ ول.
دارحان قىدىرەلٸ, «Egemen Qazaqstan» گازەتٸنٸڭ ل.گۋميلەۆ اتىنداعى ەۇۋ-دىڭ جۋرناليستيكا فاكۋلتەتٸمەن تٸكەلەي بايلانىستى ەكەنٸن اتاپ ٶتتٸ.
«بٸزدە وسى فاكۋلتەتتٸڭ 13 تٷلەگٸ قىزمەت ەتٸپ جاتىر. قازٸرگٸ تاڭدا گازەت قىزمەتكەرلەرٸ ەدەۋٸر جاسارعان. بٸزدە قازٸر ورتاشا جاس – 30. سوندىقتان, ستۋدەنتتەردٸڭ كٶبٸ بٸزدە پراكتيكادان ٶتەدٸ. سونىمەن قاتار, بٸز ٶزٸمٸزگە كادر دايارلاۋ ماقساتىندا «ەگەمەن اكادەمييا» دەگەن اتتى ستۋدەنتتەرگە ارنايى دەرٸس ۇيىمداستىرعان بولاتىنبىز. ونىڭ تۇراقتى قاتىسۋشىلارى – وسى ەۋرازييا ۇلتتىق ۋنيۆەرسيتەتٸنٸڭ ستۋدەنتتەرٸ», - دەدٸ دارحان قىدىرەلٸ.
كونفەرەنتسييا بارىسىندا دارحان قىدىرەلٸ «Egemen Qazaqstan» گازەتٸنٸڭ 100 جىلدىعىنا وراي عالىم سەرٸك قيراباەۆقا, جازۋشى, تاريحشى قويشىعارا سالعاراۇلىنا ارنايى مەرەكەلٸك مەدال تابىس ەتتٸ.
