Búgin Úkimet otyrysynda QR Qoǵamdyq damý ministri Darxan Káletaev jumyssyz jastar máselesin kóterdi, dep xabarlaidy QazAqparat tilshisi.
Ministrdiń aitýynsha, memlekettik basqarý salasynda oqý-bilimge qulyqsyz, saiasi jáne azamattyq belsendiligi tómen, jaýapkershikti óz moinyna alýǵa nietsiz jastarǵa qatysty naqty bir termin bar.
«Qazaq tilinde bul termin aǵylshyn nusqasyn qaitalap otyr. Alaida qazaq paiymyna salatyn bolsaq, bul topty «nietsiz» dep bir sózben ataýǵa bolatyn shyǵar. Ondai minez-qulyq, kóp jaǵdaida, jastardyń qoǵamnan qashýyna ákelip soqtyrady. Olar áleýmettik ortada ózderin kereksiz den sanaidy. Sýitsid pen deviatsiia siiaqty problemalardyń barlyǵy osydan týyndaidy. Otbasy qundylyqtary buzylady», - dedi D.Káletaev Úkimettiń búgingi otyrysynda.
Onyń sózine qaraǵanda, elimizde «nietsiz jastardyń» naqty kategoriialary anyqtaldy. Olar - bilim deńgeii tómen, eńbekke jaramsyz, psixikialyq aýytqýlary barlar, jaisyz otbasynan shyqqandar jáne turǵylyqty jerin únemi aýystyratyndar.
«Jastardyń jaǵdaiy men kóńil-kúiine jumyssyzdyq tikelei áser etedi. Halyqaralyq eńbek uiymynyń ótken jylǵy baiandamasyna sáikes, sońǵy 20 jyldyń ishinde álemde jastardyń sany 139 mln adamǵa ósken. Al jumyspen qamtýdyń úlesi 30 mln adamǵa kemigen. Qazaqstanda jastardy jumyspen qamtý máselesi jaqsaryp keledi. Máselen, 2011 jyly eńbek pen oqýǵa tartylmaǵan jastardyń úlesi 18,6 protsent bolsa, biylǵy jyly atalǵan kórsetkish 7,7 protsentke kemidi. Alaida bul jerde sheshimin tappai jatqan birqatar máseleler bar. Birinshiden, «nietsiz jastardyń» sany 300 myńnan asady. Bylai qarasań, ol bir oblys ortalyǵynda turatyn xalyqtyń sanymen birdei. Ekinshiden, ońtústik óńirlerde, sondai-aq, Mańǵystaý men Qaraǵandy oblystarynda jumyspen qamtylmaǵan jastardyń sany tym joǵary. Úshinshiden, jas áiel adamdardyń osy topqa kirý qaýpi zor bolyp otyr», - dep atap kórsetti D.Káletaev.
.jpeg)