Almatylyq dárigerler Qyrǵyzstanda taýdan qulaǵan tas kóshkini astynda qalyp qoiyp zardap shekkenderdiń qandai jaraqat alǵanyn aitty, dep habarlaidy QazAqparat tilshisi.
Búgin tús shamasynda Almaty áýejaiyna Bishkek mańyndaǵy taýda tas kóshkininen zardap shekken týrister tikushaqpen jetkizildi.
Qalalyq Densaýlyq saqtaý basqarmasynda habarlaǵandai, naýqastardy tekserýge 4 jedel járdem brigadasy shyqty.
«2 naýqas (Qazaqstan azamattary) jedel járdem dárigerlerine qaralyp, aýrýhanaǵa barýdan bas tartty. Qalǵan 4 naýqas (ekeýi Qazaqstan azamaty, ekeýi RF azamaty) №4 klinikalyq aýrýhanaǵa jetkizildi. Arnaiy zertteýler, diagnostikalyq tekserýlerden ótti. Tórteýi de jaraqaty jeńil bolǵan soń úilerine jiberildi», - dedi qalalyq Densaýlyq saqtaý basqarmasy basshysynyń orynbasary Nurjan Isabekov.
Onyń aitýynsha, er adamdardy qaraý barysynda barlyǵynyń terisiniń syrylýy, qoly jáne aiaqtarynyń jaraqattary, ishterine zaqym kelýi anyqtalǵan.
Er adamdardyń eń úlkeni 50 jasta bolsa, eń jasy 26 jasta eken.
Eske salaiyq, 30 shildede Qyrǵyzstan aýmaǵynda Bishkek qalasynan 40 shaqyrym qashyqtyqta Skriabin muzdyǵy aýdanynda bir top týrister tasqulamaǵa tap bolǵan edi. Zardap shegýshilerdiń arasynda tórt Qazaqstan azamaty bar. QR Syrtqy ister ministrligi Qyrǵyzstandaǵy tasqulama kezinde qazaqstandyqtyń mert bolǵanyn rastady.
Búgin QR TJK Respýblikalyq jedel-qutqarý jasaǵynyń qutqarýshylary tikushaqpen Qyrǵyzstandaǵy týristerge kómekke attanǵan edi.
