Almatylyq kásipker, máslihat depýtaty Qairat Qudaibergen aǵash túbinen tabylǵan balanyń jaǵdaiyn bilýge aýrýhanaǵa baryp, dárigerlermen kezdesti, dep habarlaidy QazAqparat tilshisi.
Belgili biznesmen bul týraly Feisbýktegi paraqshasynda jazdy.
«Búgin tańerteń saǵat 9-da qalalyq balalar shuǵyl meditsinalyq járdem ortalyǵyna baryp, belgisiz bireýler kólikpen soǵyp, tal túbine tastap ketken 4 jastaǵy Dinmuhammedtiń jaǵdaiyn bildim. Ata-anasymen kezdestim. Aýrýhananyń bas dárigeri Abai Zikiriiauly Qusaiynov tolyq aqparat aitty. Dinmuhamedtiń ómiri úshin bilikti dárigerler baryn salýda. Keshe bala úshinshi dárejedegi komada bolǵan, qazir ekinshi dárejege shyqty. Alda eń qiyn 3,5,7-táýlikter kele jatyr. Soqqydan balanyń samai súiegi ishke kirip ketken. Dárigerler uiyǵan qan men súiek jaryqshaqtaryn tazalady. Biraq soqqydan soń balanyń miy isine bastady. Bul - eń úlken qaýip. Dárigerler baryn salyp jatyr. Qajetti dáriler jetkilikti. Biraq jaǵdai óte aýyr...», - dedi ol.
Aita ketý kerek, jantúrshigerlik oqiǵa keshe shyǵys ainalma jolyna jaqyn Brianskaia kóshesinde bolǵan. 4 jastaǵy balany kólik qaǵyp, aǵash túbine qaldyryp ketken.
Ata-anasy birneshe minýt ótken soń ǵana balany júzdegen metr qashyqtan taýyp alǵan.
Almaty politsiiasy balany soqqandardy izdestirip jatyr. Qazir bul ispen Medeý aýdandyq IIB janyndaǵy politsiia bólimi ainalysýda.
