Memleket basshysy Parlament Senatynyń otyrysyna qatysty, dep habarlaidy "Ult aqparat" Aqordaǵa silteme jasap.
Qazaqstan Prezidenti Parlament Senatynyń depýtattary aldynda sóilegen sózinde Senat tóraǵasy laýazymyna sailaý úshin Dariǵa Nursultanqyzy Nazarbaevanyń kandidatýrasyn usyndy.
– Dariǵa Nursultanqyzyn barshańyz jaqsy bilesizder. Ol kópten beri sizdermen tyǵyz jumys istep keledi. Qoǵamdyq jáne saiasi qyzmetterde jinaǵan tájiribesi mol. Tek Qazaqstanda ǵana emes, sondai-aq shetelde de tanymal saiasatker. Tuńǵysh Prezident – Elbasynyń Qazaqstan halqynyń ál-aýqatyn arttyrý jáne turǵyndarǵa áleýmettik turǵydan kórsetiletin qoldaýdy kúsheitý jóninde alǵa qoiǵan aýqymdy mindetteri sapaly zańdarmen qamtamasyz etilýi kerek. Sondyqtan biz Dariǵa Nazarbaevaǵa osyndai jaýapty missiiany júktep otyrmyz. Osyǵan bailanysty, Parlament Senatynyń depýtattarynan men usynǵan kandidatýrany qoldaýdy suraimyn, – dedi Qasym-Jomart Toqaev.
Nátijesinde, Dariǵa Nazarbaeva depýtattar arasynda jasyryn daýys berý jolymen Senat spikeri bolyp sailandy. Daýys berýge qatysqan 44 depýtattyń barlyǵy Nazarbaevanyń kandidatýrasyn biraýyzdan qoldady.
"Dariǵa Nursultanqyzy Nazarbaeva Parlament Cenatynyń tóraiymy bolyp sailandy. Quttyqtaimyz", - dedi Senat spikeriniń orynbasary Bektas Beknazarov.
Dariǵa Nazarbaeva buǵan deiin Cenattyń halyqaralyq ister, qorǵanys jáne qaýipsizdik komitetin basqarǵan edi.
Al Cenattyń burynǵy tóraǵasy Qasym-Jomart Toqaev búgin el halqyna ant berip, Qazaqstan Prezidenti boldy.
Dariǵa Nazarbaeva – Qazaqstannyń Tuńǵysh Prezidenti Nursultan Nazarbaevtyń úlken qyzy. Ol 1963 jyldyń 7 mamyrynda Qaraǵandy oblysy Temirtaý qalasynda týǵan.
Lomonosov atyndaǵy Máskeý memlekettik ýniversitetin, Kirov atyndaǵy Qazaq memlekettik ýniversitetin bitirgen. Mamandyǵy tarihshy, tarih jáne qoǵamtaný oqytýshysy.
Saiasattaný ǵylymdarynyń doktory, tarih ǵylymdarynyń kandidaty.
2012 jyldyń qańtar aiynda depýtat qyzmetine keldi. 2014 jyldyń sáýir aiynan bastap Májilistiń vitse-spikeri qyzmetin atqardy. Al 2015 jyldyń qyrkúiek aiynan bastap Qazaqstan Premer-ministriniń orynbasary boldy. 2016 jyldyń qyrkúieginde Senat depýtaty bolyp sailanǵan.
"Parasat", ekinshi dárejeli "Barys", Frantsýz Respýblikasynyń óner jáne ádebiet ordenderimen, "Nur Otan" HDP "Belsendi qyzmeti úshin" medalimen, QR Konstitýtsiialyq Keńesiniń "Konstitýtsiialyq zańdy nyǵaitýǵa qosqan úlesi úshin" medalimen jáne mereitoilyq medaldarmen marapattalǵan.
Qazaq, orys, aǵylshyn, italian, nemis tilderin biledi.
