Dáribaevtar otbasylyq ansambliniń negizin qalaýshy Ibragim Dáribaev 65 jasynda dúnieden ozǵany habarlandy. Táýelsizdiktiń alǵashqy jyldary qurylǵan Dáribaevtar ansambli aýmaly-tókpeli zamanda halyqtyń janyna medeý bolyp, toi-dýmanda qazaq ánderine jańa lep ákelgen edi. Ult.kz Ibragim Dáribaevtyń BAQ betterine bergen suhbattaryna úńildi.
Balalyq shaǵy týraly
Anam Aqbastaýda mektep direktory bolatyn. Sodan jazda mekteptegi búkil aspaptardy úige ákep qoiatyn. Baian, akkordeon, gitara, mandalin bolatyn, bárin tartyp kóretinmin. 7-synyp oqyp júrgende vokaldy aspaptar ansambline qabyldandym, sol kezde bas gitara - bir, solo gitara - bir, baraban bar, organ bolatynyn bildim. Repetitsiia kezinde anany bir túrtemiz, mynany bir túrtip, sóitip júrip úirendik.
Bala kezimiz 60-70 jyldarǵa týra keldi. Aýylda turmystyq jaǵdai onsha bolmady. Biraq baian áperse dep armandaitynmyn. Synyptastarym velosiped armandasa, men baiandy armandaitynmyn. Baian 120 som turady, oǵan áke-sheshemniń áperýge jaǵdaiy joq. Aýyldyń tómen jaǵynda Aǵabek degen aǵam bolatyn Mádeniet institýtynda oqityn. Sol kisi úiinde bolmaǵanda apamyzdan baianyn surap alyp, sol kisilerdiń esiginin aldynda oinap úirenetinmin. Qazir 8 aspapta oinaimyn.
Áielimen tanystyǵy týraly
Qylshyldap turǵan jas kezim. Col jyldary birneshe vokaldy-aspapty ansamblder qurýǵa uiytqy bolǵanymmen, birinen keiin biri sátsizdikterge ulasyp, tarap tyndy. «Jyǵylǵan kúreske toimasy» belgili. Jastyq jigerimdi jasytpai taǵy da táýekelge bel býyp, Shymkent qalasyndaǵy Fosforshylar mádeniet úii aiasynda «Raýan» atty vokaldy-aspapty ansambldiń negizin qaladym. Jańa ansamblge talantty ánshi qyz-jigitterdi izdestirip jatqanymyzdy jan-jaqtan estigenderdiń talaiy baqtaryn synap kórdi. Sonyń biri jumys izdep kelip jubaiyma ainalǵan Áliia edi.
Qazaqtyń qarapaiym qyzy Áliia meni jibektei minezimen, turaqtylyǵymen, ásem daýysymen birden baýrap aldy. Jastyqtyń jalynymen ólip-óship órtenip kete jazdap ǵashyq boldym. «Sofiia Rotarýdyń kúieýi ansambldiń jetekshisi ǵoi. Maǵan turmysqa shyqsań Rotarýǵa uqsap qudai qosqan jaryńmen bir ansamblde án shyrqap júresiń»,- dep qaljyńdap, sezimimdi bildirip júrdim. Ómir bolǵan soń ónerdi damytýda ár alýan qiynshylyqtardyń kezdesetini zańdy. «Raýan» ansambliniń quramyndaǵy qyz-jigitterdiń kóbisi soǵan tózimdilik tanytpai ýaqyt óte kele jan-jaqqa shashyrap ketti. Sondai syn saǵatta janymda Áliia ǵana turaqtap qaldy. Oǵan «ómirdiń qiynshylyqtaryn da, qýanyshtaryn da birge kóreiik» dep sóz saldym. Aǵasyna jolyǵyp, ekeýmiz ómirlik serik bolýǵa sóz bailasqanymyzdy aitqanda «qazaqtyń saltymen qyzdy uzataiyq» dedi. Ony kútetin men be, qyz uzatý salty uzaq merzimge sozylyp ketetindikten ailaǵa kóshtim. Sóitip sol kezeńderde jigitterdiń merekesi sanalatyn 23 aqpan kúni (Sovet armiiasy kúni) súigen qyzymdy alyp qashtym. «Ońtústik Qazaqstan» gazetindegi jýrnalist Óskenbai Ámzeev aǵamyzdyń «Volgasymen» aýylǵa kelinshek ákeldik, dýmandatyp betashar toi jasadyq. Aýyldaǵy qurdastarymnyń arasynda alǵashqy bolyp otaý tiktim. Bul 1980 jyly KSRO tarihyndaǵy Olimpiada oiyndary ótken erekshe jyl edi.
Dáribaevtar ansambli men balalary týraly
Qansha ansaml qursam da, ánshiler men mýzykanttar tarap ketip jatty. Qyzdar turmysqa shyǵyp ketedi, jigitter áskerge ketedi. Sóitip júrgende óz otbasymmen ansambl qurýdy sheshtim. Ol kezde Reseide "Grýppa Stasa Namina" degen top bolatyn. "Ibragim" toby deiin desem, halyq qabyldamaityn siiaqty kórindi. Sol kezderi Shymkentte otbasylyq ansamlder konkýrsy bolatyn. Soǵan Dáribaevtar ansambli dep bir jyldai daiyndalyp júrip, qatysyp, jeńimpaz atandyq. Osylaisha, áielim Áliia ekeýmiz ansamldi bastap kettik. Basynda inilerim de top múshesi bolatyn.
Úlken ulym Sáken ata-ájesiniń balasy bolyp ósti. Odan keiin Merýert pen Gúlden dúniege keldi. Biraz jyldan soń Aiia qyzymyz jaryq dúnie esigin ashty.
Ujymdaǵy jumys týraly
Biz tek otbasy ǵana emes, úlken shyǵarmashylyq ujymbyz. Bizdiń bir maqsatta eńbek etip, aýyzbirshiligimizdiń ajyramaýy osy ujymdyq tártipte jatyr. Ai saiyn otbasymdy, ujymymdy jinap jinalys ótkizip turamyn. Kimniń qandai oiy bar, shyǵarmashylyq ideiasy bar. Barlyǵyn ortaǵa salyp, talqylap otyramyz. Men balalarymnan syrtta maǵan jetekshi retinde qaraýyn talap etip, qatańyraq bolsam, úide barynsha meiirimdi bolýǵa tyrysamyn.
