© Sputnik / Vladislav Vodnev
Densaýlyq saqtaý ministrligi dári-dármektiń qymbattaýyna qatysty túsinikteme berdi, dep habarlaidy Sputnik Qazaqstan.
Búgin ortalyq kommýnikatsiialar qyzmetinde ótken brifingte jýrnalister densaýlyq saqtaý ministri Ajar Ǵiniiattan dári-dármektiń ne sebepti qymbattaǵanyn túsindirýdi surady. Ol osy jumysqa meditsinalyq jáne farmatsevtikalyq baqylaý komiteti tolyq aqparat bere alatynyn aityp, sózdi komitet tóraǵasy Baýyrjan Baiserkinge berdi.
Onyń aitýynsha, búginde dári-dármektiń shekti baǵasy belgilengen. Biraq ol "naqty bir baǵa bekitilgen" degen sóz emes. Memleket baǵanyń maksimaldy jáne minimaldy shegin belgileidi. Jeke menshik dárihanalar baǵany odan joǵary kótermeýi kerek.
"Tártip boiynsha dárihanalar sol minimaldy jáne maksimaldy shektiń arasyndaǵy baǵany qoia alady. Odan joǵary kóterýge bolmaidy. Biz sol joǵary shekti baqylap otyramyz. Osy ýaqytqa deiin baǵany eki-úsh esege kóterý jaǵdailary tirkelgen joq", - deidi Baiserkin.
Komitet basshysy jylyna eki ret baǵanyń qaita qaralatynyn da eske saldy. Qazirgi shekti baǵalar maýsym aiyna deiin saqtalýy shart. Alaida jeke menshik dárihanalar tarapynan baǵany shekti mólsherden kóterý jaǵdailary bar. Respýblika boiynsha 40 ret anyqtaldy. Barlyǵyna aiyppul salyndy.
"Eger belgili bir preparattyń baǵasyn qatty kóterip jiberse, meditsinalyq jáne farmatsevtikalyq baqylaý komitetiniń aimaqtyq bólimshelerine shaǵym túsire alasyz. Túbirtekti saqtap qoiyńyz. Ony da kórsetý kerek bolady. Sonyń negizinde biz tekseris jasaimyz", - dep atap kórsetti Baiserkin.
Qazirgi kezde jyldyń ekinshi jartysyna shekti baǵalardy belgileý sharalary atqarylyp jatyr. Ol úshin arnaiy buiryq bolady. Osy qujat qoǵam talqylaýyna shyǵarylady.
Densaýlyq saqtaý ministri Ajar Ǵiniiat jeke menshik dárihanalardy aryz-shaǵymsyz tekserýge ruqsat joq ekenin erekshe atap ótti. Al qoǵam tarapynan baqylaý bolsa, ministrlik shuǵyl túrde tekseris jasai alady. Ol úshin meditsinalyq jáne farmatsevtikalyq baqylaý komiteti shaǵym túsýi kerek.
