Sybailas jemqorlyqqa qarsy is-qimyl agenttiginiń Facebook-tegi tikelei efirinde Respýblikalyq arnaiy monitoring toby tóraǵasynyń orynbasary, Qazaqstan balalar úiiniń túlekteri qaýymdastyǵynyń prezidenti Rafael Gasanov monitoring toby betpe-bet kelgen problemalar týraly aityp berdi, dep habarlaidy QazAqparat.
«Problema bar. Keide uzaq ýaqyt boiy sheshilmegen túiindi másele osyndai qiyn jaǵdaida rettelip ketedi. Qazir bizdiń arnaiy monitoring tobynyń músheleriniń kúshi dári-dármekke, onyń jetkizilýine, qymbattatyp satylýy máselelerin sheshýge baǵyttalǵan. Máseleniń kóptigi sonshalyq, olar týraly aitqym da kelmeidi. Birinshi jaǵdai - dári-dármektiń dárihanalarǵa jetkizilmeýine bailanysty. Dárihanalarǵa bardyq, bárin tekserdik. Sodan keiin ekinshi qadamǵa baryp, qoimalardy qaradyq. Adamdarmen sóilese bilý kerek, aqparattyq almasý júrgizilýi tiis. Áriptesterimizben osy taqyrypta uzaq áńgimelestik. Dári-dármekti satyp alý týraly ótinishter «SK-Farmatsiiaǵa» túsip jatqan. Basqa másele: bul ótinimder boiynsha jumys qalai júrgizilgen? Nelikten ótinimdi «SK-Farmatsiia» alǵan da, úsh aidan keiin ǵana másele pysyqtalǵan? Dárihanaǵa dári-dármek alýǵa kelgen adamdy ótinishtiń qashan berilgeni qyzyqtyrmaidy. Ol úshin eń bastysy - dári-dármek alý. Kei farmatsevtikalyq dárihanalar azamattardyń bul oiymen kelispedi. Tipti kei jaǵdaida biz kelgende olar dárihanalarǵa kirgizbedi de. Bári bizdi janjal shyǵarǵysy keletinder retinde kórdi. Alaida bul - is júzinde olai emes. Qazir Almatyda dári-dármekti turaqtandyrý qoryn qurý úshin 5 milliard teńge qajet. Sondyqtan tapshylyq azdap sezilmeidi», - dedi Rafael Gasanov.
Áńgime barysynda ol shet qalmaǵan volonterlerge alǵysyn aitty.
«Grant alǵanymen, kómekke qulaq aspaǵan meditsinalyq ýniversitetter bar. Olardy osy granttardan aiyrý kerek dep oilaimyz. Men tipti S.D. Asfendiiarov atyndaǵy Qazaq ulttyq meditsinalyq ýniversitetiniń rektoryn da bilmeimin. Biraq men osy ýniversitettiń stýdentterin jaqsy bilemin. Olar kómektesýge erikti retinde keldi. Keibireýi - bizdiń baqylaý tobymyzdyń músheleri. Olar barynsha tyrysyp jatyr. Biz Almaty ákiminiń orynbasarlarynan osy eriktilerdi múmkindiginshe qorǵaýdy suradyq, óitkeni olar dárigerler men politseilermen bir maidanda júr», - dedi spiker.
