Aýdandyq mádeniet saraiynyń direktory men esepshisi sybailas jemqorlyqqa qarsy qyzmet ókilderine para bermek bolǵan, dep habarlaidy "Ult aqparat".
Sybailas jemqorlyqqa qarsy is-qimyl agenttiginiń asa mańyzdy ister jónindegi tergeýshisi Daniiar Begaidarovtyń aitýynsha, jemqorlyqpen kúres sapyndaǵy mamandarǵa para usynǵan mádeniet saraiynyń basshysy 4,5 mln teńge aiyppul arqalaǵan.
«Laýazymdy tulǵalar sybailas jemqorlyqqa qarsy qyzmet qyzmetkerlerine ózderiniń jeke máselelerin sheshý úshin para berýge tyrysatyn jaǵdailar da bar. 4 naýryzda Qazyǵurt aýdandyq mádeniet saraiynyń direktory Qazyǵurt aýdandyq sotynyń úkimimen 4,5 mln teńge aiyppul arqalady. Para usynǵandardyń taǵy bireýi - sol uiymnyń bas esepshisi. Oǵan 1,5 mln teńge aiyppul taǵaiyndaldy» - dedi Daniiar Begaidarov.
Onyń sózine qaraǵanda, Túrkistan oblysynyń Saryaǵash aimaǵy boiynsha sybailas jemqorlyqqa qarsy is-qimyl jónindegi aýdanaralyq basqarmasynyń qyzmetkeri 2018-2020 jyldarǵa arnalǵan biýdjet qarajatynyń igerilýin, onyń ishinde «Eńbek» aiasynda bólingen qarajattyń igerilýin teksergen. Osy iste quzyrly organ ókilderiniń qamqorlyǵyna ie bolý úshin direktor men bas esepshi 300 myń teńge kóleminde para berýge árekettendi degen kúdikke ilingen.
