Shyǵys Qazaqstan oblysynyń ákimi aimaqtaǵy tasqynǵa bailanysty brifing ótkizdi. Ol «Aiagóz bolashaq» qoryna bir ailyq eńbekaqysyn aýdarǵanyn aitty, dep habarlaidy QazAqparat tilshisi.
Ákimniń aitýynsha, 10 naýryzdan bastalǵan tasqyn kezinde oblys boiynsha 229 úige sý kirgen. Onyń 189-y Aiagóz qalasyna tiesili. Óskemende 24, Ulan aýdanynda 5, Glýbokoe aýdanynda 8, Zaisan aýdanynda 2, Kúrshim aýdanynda 1 úige sý kirgen. Sondai-aq, 193 aýla men 110 saiajai nysany da sý qursaýynda qalǵan. Qazir barlyq eldi mekender sýdan arylǵan. Jańbyr sýynan japa shekken aýdandardyń qataryna Zyrian, Katonqaraǵai, Tarbaǵatai, Shemonaiha aýdandary men Ridder qalasy da endi.
Al Aiagózdegi baspanasy qulap qalǵan 8 otbasyǵa birinshi kezekte baspana satyp alynady. Oǵan qajetti qarjy bólinip te qoiǵan.
«Búgin saǵat 10-ǵa deiin «Aiagóz bolashaq» qoryna oblystyq «Paryz» qorynan 50 mln teńge aýdardyq. Bul qarjyǵa halyqtyń qajettiligine qarai kómir, qurylys materialdary, kiim-keshek alynady. Úii qulaǵan 8 otbasyǵa dereý úi satyp alyp beremiz. Osy sózimnen keiin Aiagózde úi baǵasy qymbattamaidy dep úmittenemin. Eki kún buryn munda 15 úi satylady degen aqparat bolǵan. Sol kezde aitylǵan baǵa ózgermeidi dep senemin. Qymbattap ketken kúnniń ózinde adamdardy dalada tastap qoimaimyz. Úileri apattyq jaǵdaida dep tanylǵan adamdar da baspanasyz qalmaidy. Aiagózdiń ózinde 60 páterlik turǵyn úi salynyp jatyr. Ol qoldanysqa tek 4 aidan keiin beriledi. Sondyqtan biz qajetti baspanany ekinshi naryqtan izdeitin shyǵarmyz», - dedi ol.
Apat kezinde óńirdiń barlyq aýdandarynan 385 adam qaýipsiz jerge kóshirilipti. Aiagózdegi 360 adamnyń 73-i áli de internat ǵimaratynda kúneltýde. Onyń 42-si - bala. Danial Ahmetov eshbir oqýshy sabaqtan qol úzbegenin de aitty. Óskemende baspanasy turýǵa jaramsyz bolǵan 22 adamnyń jeteýi «Úlbi» áleýmettik qyzmet ortalyǵyna ornalastyrylǵan.
«Keshe Aiagózdiń jaǵdaiymen tanystym. Onyń aldynda Óskemen men Ulan aýdanyndaǵy sý basqan eldi mekenderdi aralaǵanymdy bilesizder. Apat Aiagóz halqyn biriktire túsipti. Eldiń birlik-berekesi qiyn sátte syr bermegenin kórip qýandym. Ázirge jaramsyz bolyp qalǵan úilerdiń sany 18. Bul san áli ósýi múmkin. Oǵan keshe kózim jetti. Biraq aitarlyqtai alshaqtyq bolmaýy kerek. Aýdan ákimdigi barynsha tiimdi jumys istep, shiraqtyq tanytqanyn da aita ketý kerek», - dedi ákim.
Onyń aitýynsha Aiagózdegi jaǵdai qaitalanbas úshin oblystaǵy jaǵdaidy mamandar áýeden baqylap, monitoring júrgizbek. Qazirdiń ózinde 6 tikushaq kóterilip, sát saiyn aqparattardy jedel shtabtyń aldyna túsirýde.
«Aiagózde sý shaiǵan kópirdi jańalaimyz. Jalpy biyl qalanyń infraqurylymyn retteýge 4 mlrd teńge bólingen. Endi jobalardy qaita qarap, tasqynnan qorǵaný, aryq-bóget júiesin bekemdeý sharalaryn qolǵa alamyz. Mamandardyń aitýynsha mundai jaǵdai Aiagózde sońǵy 50 jylda bolmaǵan eken. Úiin sý shaiyp ketken adamdarmen de sóilestim. Eń bastysy olardyń erteńge degen senimi joǵalmapty. Ol senimdi aqtaimyz da», - dedi Danial Ahmetov.
Ulan aýdanynyń Mamai batyr aýylyna da jańa kópir salynatyny rastaldy.
«Burynǵy kópirdiń asty temir, beti aǵash bolatyn. Onyń ornyna temir-beton materialdan eni áldeqaida keń jańa kópir salamyz. Qazir onda da qatynas qalpyna keltirildi», - dedi aimaq basshysy.
Sóz sońynda Danial Ahmetov bar kináni tabiǵatqa artyp, qol qýsyryp otyra berýge bolmaitynyn eskertti.
«Mysaly Óskemen qalasynyń Sátpaev dańǵylyndaǵy jalǵyz oiyqpen qala biligi 8 saǵat boiy áýrelendi. Sý jaiylǵan kúni-aq qosymsha qiyrshyq tastar daiyndap oiylǵan jerlerdi bitei qoiý kerek bolǵan. Al qala ákimi onyń ornyna qozǵalysty toqtatqan. Sý alǵan úilerge de kómek durys uiymdastyrylmaǵan. Dabyl jetken sátte-aq ár úige 10-15 maman jiberý kerek edi. Bul jerde tabiǵat emes, ózimiz jaǵdaidy qiyndatqanbyz. Tájiribesiz basshylarǵa barlyǵyn eskertip otyrmaǵan meniń de kinám bar shyǵar», - dedi Danial Ahmetov.
Sinoptikter aptanyń sońyna qarai taǵy da kún kúrt jylynyp, jańbyr kúsheiedi degen boljam aitýda. Apat qaitalansa, tótenshe jaǵdai qyzmetiniń jeke quramynan bólek 500-den astam áskeri qyzmetker de kómekke kelýge ázir kórinedi.
