Úkimet úiinde QR Premer-Ministri Álihan Smaiylovtyń tóraǵalyǵymen Daǵdarysqa qarsy sharalar jónindegi jedel shtabtyń kezekti otyrysy ótti, dep habarlaidy primeminister.kz.
Otyrysta kólik jáne saýda máseleleri qaraldy. Jedel sheshimdi talap etetin negizgi máselelerdiń biri – týyndaǵan kóliktik-logistikalyq problemalardy sheshý.
Premer-Ministr qazaqstandyq júkterdiń tranziti boiynsha Ázerbaijanmen jáne Grýziiamen kelissózder nátijelerin eskere otyryp, jedel sharalar qabyldaýdy jáne balamaly kólik dálizderin paidalaný múmkindigin qarastyrýdy tapsyrdy.
Osy oraida Smaiylov qazaqstandyq júkterdi tasymaldaý tarifterin tómendetýdiń mańyzdylyǵyn atap ótti.
Sonymen qatar syrtqy saýda jaǵdailarynyń ózgerýine, onyń ishinde ulttyq valiýta baǵamynyń aýytqýyna, sheteldik shikizat, materialdar men taýarlardy jetkizý tizbekteriniń ózgerýine bailanysty 140-qa jýyq ótinish qaraldy.
QR Premer-Ministriniń orynbasary Baqyt Sultanovtyń aitýynsha, biznes ókilderiniń ótinishterin naqty pysyqtaý boiynsha jumys júrgizilip jatyr. Atap aitqanda, tsement salasyndaǵy, jeńil ónerkásiptegi, akkýmýliatorlar, kabel-ótkizgish ónimderin óndirýshi 16 qazaqstandyq kásipornynyń problemalyq máseleleri qaraldy.
Qazaqstandyq óndirýshi-eksporttaýshylardy qoldaý jáne yntalandyrý úshin Úkimet qajetti qarjylyq jáne servistik qoldaý sharalaryn kórsetedi. Qazirgi ýaqytta 1,5 mln tonnadan astam azyq-túlik kóleminde áleýmettik mańyzy bar azyq-túlik taýarlarynyń jetkilikti qory qalyptastyryldy. Qazaqstan Respýblikasy Saýda jelileri odaǵynyń aqparatyna sáikes, saýda oryndaryndaǵy qor halyqtyń taiaý ýaqyttaǵy qajettiligin qamtamasyz etedi.
Óndiriste importtyq taýarlardy paidalanatyn óndirýshilerdiń ekonomikalyq belsendiligin qoldaý, sondai-aq ishki naryqty azyq-túlikpen tolyqtyrý úshin Premer-Ministr ekonomikaǵa áser etetin taýarlarǵa importtyq kedendik bajdardy alyp tastaý máselesin qarastyrýdy tapsyrdy.
Jedel shtabtyń kelesi otyrysy 10 naýryzda ótedi.
