Qazaqstan koronavirýs boiynsha «jasyl» aimaqta nemese táýekeli tómen aimaqta tur. «Qyzyl» nemese qaýipti aýmaqta eki óńir bar. Olar – Soltústik Qazaqstan jáne Pavlodar oblystary. Bul týraly QR densaýlyq saqtaý vitse-ministri, bas memlekettik sanitarlyq dáriger Erlan Qiiasov OKQ brifinginde málimdedi.
«Aldyńǵy aptamen salystyrǵanda «qyzyl» aimaqtan «sary» aimaqqa Qostanai jáne Aqmola oblystary aýysty. «Sary» aimaqta Almaty, Nur-Sultan qalalary, ShQO jáne Atyraý oblystary tur. «Sary» aimaqtan «jasyl» aimaqqa BQO aýysty. Qalǵan óńirler «jasyl» aimaqta. Ótken eki apta ishinde koronavirýspen aýyrǵandar sany 10 protsent ósti», - dedi. Elimizde ótken táýlikte koronavirýs infektsiiasyn juqtyrǵan 777 jaǵdai tirkeldi.
Pavlodar oblysynyń Aqsý qalasyndaǵy qarttar úiinde 65 adamnan koronavirýs indeti anyqtaldy. Aýrýy rastalǵan 33 jan sondaǵy juqpaly aýrýlar aýrýhasyna jatqyzylǵan. Qalǵan 27 adam dárigerlerdiń baqylaýynda. Bir naýqastyń jaǵdaiy aýyr. Buǵan qosa qarttar úiiniń 11 qyzmetkeri indet juqtyrǵany belgili boldy. Jalpy qarttar úiinde 150 adam turady. Olardyń bárinen PTR synama alynǵan. Bul jaǵdai oblystyq densaýlyq saqtaý basqarmasynyń erekshe baqylaýynda. Qariialardyń jappai indet juqtyrýyna naqty qandai sebep bolǵanyn dóp basyp eshkim aita almaidy. Jalpy oblys boiynsha koronavirýsqa shaldyqqandar sany 7 myń 212 adamǵa jetti. Naýryz aiynan beri eseptegende virýstyq infektsiiadan 62 adam kóz jumdy. Sonymen qatar, Pavlodar oblysynda qoǵamdyq kólikterde sanitarlyq talaptar kúsheiedi. Sebebi jolaýshyǵa lyq toly avtobýstar sany áli de barshylyq. Al bul kovid juqtyrý boiynsha qyzyl aimaqqa kirip otyrǵan óńirdegi jaǵdaidy odan ári ýshyqtyrary anyq. Sondyqtan monitoringtik top ókilderi jolaýshy tasymalymen ainalysatyn kólik ieleri arasynda túsindirý jumystary men tekseristi qatań qolǵa aldy.
Almatynyń dári-dármek qorynda 8 million dári bar. Bul 68 ataý boiynsha jáne jeke qorǵaný quraldarynyń eki aiǵa jetetin mólsheri bar. Bul týraly Almaty qalasynyń ákimi Baqytjan Saǵyntaev aitty. Onyń aitýynsha, bul maqsatqa 10 milliard teńge bólindi: emhanalar men dárihanalardy dári-dármekpen qamtamasyz etýge shamamen 5 milliard teńge bólinedi. Sondai-aq Baqytjan Saǵyntaev qalada shekteý sharalaryn kúsheite alatyn jaǵdailardy atap ótti. Bul koronavirýs juqtyryp, aýrýhanaǵa jatqyzylǵandardyń kórsetkishine bailanysty dedi. Megapoliste pandemiianyń jańa tolqynyna 7000 tósekten asatyn 23 statsionar daiyndaldy. Onyń ishinde 250-i reanimatsiialyq. Klinikalardyń materialdyq-tehnikalyq bazasyn nyǵaitý úshin biyl 4 myńnan astam jabdyq satyp alyndy. Onyń ishinde 236 ókpeni jasandy jeldetý apparattary bar.
Almatyda jańajyldyq saýyq keshteri men toi-dýmanǵa ruqsat joq. Kúz ailarynan beri qaýipti dertke 1600-den astam adam shaldyqqan. «Syrqattanýshylar arasynda 20-40 jas aralyǵyndaǵy turǵyndar da jii kezdesedi», - dedi qalanyń Bas sanitarlyq dárigeri Jandarbek Bekshin. Karantin tártibin qatańdatý maqsatynda birshama sharalar qolǵa alynǵan. Iri saýda-sattyq oryndary senbi kúni tek keshki saǵat 17:00-ge deiin ashyq. Al, jeksenbide jabyq bolady. Degenmen, mereke qarsańynda saýda ortalyqtary men gipermarketterdiń táýlik boiy jumys isteý máselesi qarastyrylyp jatyr. Jalpy qalada karantindik shekteýdi elemegenderge 780 ákimshilik quqyq buzýshylyq týraly hattama toltyrylyp, 13 is sotqa joldanǵan.
Ótken jeksenbide el aýmaǵyna 22 halyqaralyq reispen 2860 adam ushyp keldi. Olardyń 532-iniń qolynda PTR anyqtama bolmai shyqty. Atap aitsaq, Nur-Sultan áýejaiynda 271, Almatyda 200, Oralda 61 jolaýshy anyqtalyp, teskeristen ótýi úshin karantindik statsionarǵa jatqyzyldy. Degenmen, bul azamattar jasatqan test eshqandai infektsiia belgileri joq ekenin kórsetti, dep habarlaidy sanitarlyq-epidemiologiialyq baqylaý komiteti.
Qostanai, Rýdnyi jáne Jitiqara qalalarynda sanitarlyq beketter alyndy. Biraq kórshi oblystar men Resei elimen shekaradaǵy shekteýler saqtala beredi. Bas sanitar dárigerdiń qaýlysymen aimaqta karantin sharalary jeńildedi. Budan bylai qoǵamdyq tamaqtaný nysandarynyń jumysy saǵat keshki 23:00-ge deiin uzartylady. Qalalyq avtobýstar men taksi osy ýaqytqa deiin qatynai alady. Fitnes, akva, termopark, shipajailar men demalys oryndary 30 protsenttik mejemen jumys isteidi. Degenmen bulardyń bári demalys jáne mereke kúnderi qyzmet kórsete almaidy. Turǵyndarǵa keshki saǵat 23:00-den tańǵy 6:00-ge deiin kóshege shyǵýǵa áli de tyiym salynǵan. Mundai shekteý 14 jeltoqsanǵa deiin saqtalady.
Qaraǵandy oblysyndaǵy iri saýda oryndary demalys jáne mereke kúnderi de ashyq bolady. Tek kásipkerler barlyq sanitarlyq talapty saqtai otyryp, keshki saǵat 17:00-ge deiin jumys istei alady. Bul shekteýdiń azyq-túlik dúkenderi men dárihanalarǵa qatysy joq. Al balalardyń oiyn ortalyqtary áli de jabyq. Oblystyń Bas sanitar dárigeriniń jańa qaýlysy jeksenbiden bastap kúshine enedi. Aita ketý kerek, qazir Qaraǵandy oblysynda epidemiologiialyq ahýal turaqty.
Aqtóbe oblysyndaǵy saýda oryndary da jeksenbi kúni jumys isteidi. Bas sanitarlyq dárigerdiń qaýlysy aldaǵy jumadan bastap kúshine enedi. Sondai-aq janarmai beketteri, tehnikalyq qyzmet kórsetý ortalyqtary, aiaq-kiim, tigin sheberhanalary men himiialyq tazalaý qyzmeti de ózderiniń ishki tártipterine sáikes jumys istei alady. Tamaq jetkizýmen ainalysatyn fýdkorttardyń qyzmetine de ruqsat. Al, mektepke deiingi uiymdar kezekshi toptarǵa 20 balaǵa deiin qabyldai beredi. Degenmen, Jańa jylǵa orai kópshilikke arnalǵan is-sharalar, balabaqshalarda keshter ótkizýge bolmaidy.
