ChatGPT-di ázirlegen OpenAI kompaniiasy Qazaqstan biýdjetine 2025 jyl úshin 1,8 milliard teńge kóleminde qosymsha salyq tóledi. Bul týraly Memlekettik kirister komitetiniń tsifrlyq aktivterdi ákimshilendirý basqarmasynyń basshysy Talǵat Ádilov málimdedi, dep habarlaidy ult.kz.
Onyń aitýynsha, 2025 jyldyń qorytyndysy boiynsha salyq mindettemelerin oryndaýǵa qatysty suraqtar týyndaǵan 77 sheteldik internet-kompaniia anyqtalǵan. Keibir platformalar Qazaqstanda shartty tirkeýden ótpese, endi birinde qazaqstandyq paidalanýshylar jasaǵan tólemder men tólengen qosylǵan qun salyǵy arasynda aiyrmashylyqtar anyqtalǵan.
Salyq organdarynyń habarlamasynan keiin shamamen segiz kompaniia óz mindettemelerin oryndaǵan. Sonyń ishinde eń iri somanyń biri OpenAI-ge tiesili boldy.
Sondai-aq AliExpress marketpleisi kameraldyq baqylaý nátijesinde Qazaqstan biýdjetine 600 million teńgeden astam qarjy aýdarǵan.
Memlekettik kirister komitetiniń málimetinshe, «Google salyǵy» 2022 jyldan beri qoldanysta. Osy ýaqyt ishinde sheteldik internet-kompaniialar biýdjetke 146,5 milliard teńge aýdarǵan, onyń 57,6 milliard teńgesi 2025 jylǵa tiesili.
2026 jyldan bastap QQS tóleýshi retinde tirkelmegen nemese salyq organdarynyń talaptaryn oryndamaǵan sheteldik internet-platformalar Qazaqstan aýmaǵynda buǵattalýy múmkin.
