Qazaqstandyqtardyń zeinetaqy jinaqtarynyń eń tómengi jetkiliktilik shegin esepteýdiń jańa tártibi 5 maýsymnan bastap kúshine enedi. Osyǵan bailanysty qazirgi talaptar boiynsha zeinetaqy jinaǵynyń bir bóligin paidalanǵysy keletin azamattar ótinimdi búgin, 4 maýsymǵa deiin tapsyryp úlgerýi qajet, dep habarlaidy ult.kz.
Buǵan deiin Premer-ministr Oljas Bektenov eń tómengi jetkiliktilik shegin esepteý ádistemesin ózgertý týraly qaýlyǵa qol qoiǵan bolatyn. Bul kórsetkish – azamattyń bolashaq zeinetaqy tólemderin qamtamasyz etý úshin Biryńǵai jinaqtaýshy zeinetaqy qoryndaǵy (BJZQ) shotynda qalýy tiis eń tómengi soma.
Qoldanystaǵy ereje boiynsha jetkiliktilik sheginen asatyn qarajatty turǵyn úi jaǵdaiyn jaqsartýǵa, emdelýge nemese investitsiialyq basqarýǵa berýge bolady. Alaida 5 maýsymnan bastap bul shek jańa formýla arqyly esepteledi.
Jańa ádisteme azamattyń jasyn, ómir súrý uzaqtyǵyn, eń tómengi zeinetaqy mólsherin, bolashaq jarnalardy, investitsiialyq tabysty jáne ózge de kórsetkishterdi eskeredi. Iaǵni memleket adamnyń zeinet jasyna jetkenge deiingi jáne odan keiingi qarjylyq qajettilikterin eseptep, shotta qalýǵa tiis somany anyqtaidy.
«Otbasy bankiniń» málimetinshe, ótinimderdiń qazirgi talaptar boiynsha qaralýy úshin olardy 4 maýsym kúni qosa alǵanda enpf-otbasy.kz platformasy arqyly rásimdep, qol qoiyp, joldaý qajet. Osy merzimnen keiin berilgen ótinimder jańa talaptar negizinde qaralady.
Eńbek jáne halyqty áleýmettik qorǵaý ministrligi turǵyn úi satyp alý, ipotekany óteý, emdelý nemese investitsiialyq basqarýǵa berý múmkindigi saqtalatynyn málimdedi. Sonymen qatar vedomstvo zeinetaqy jinaqtarynyń negizgi maqsaty azamattardy zeinet jasynda qarjylyq turǵydan qamtamasyz etý ekenin eske saldy.
Aita keteiik, artyq jinaqty turǵyn úi satyp alýǵa, ipotekany jabýǵa, «Otbasy bankindegi» depozitke aýdarýǵa, qymbat emdelý qyzmetterin tóleýge nemese investitsiialyq portfeldi basqarýshyǵa senimgerlik basqarýǵa berýge bolady.
