Foto: Tengrinews.kz
2022 jylǵa bólingen biýdjet qarajatyn tiimsiz paidalanǵany úshin 82 joǵary laýazymdy tulǵa jazalandy. Bul týraly Qarjy ministri Erulan Jamaýbaev málimdedi, - dep habarlaidy Tengrinews.kz.
25 mamyrda Senatta Úkimet pen Joǵarǵy esep palatasynyń 2022 jylǵa arnalǵan respýblikalyq biýdjettiń atqarylýy týraly esepteriniń tanystyrylymy ótti.
"Memlekettik baǵdarlamalar men ulttyq jobalardy iske asyrý qorytyndylaryna keletin bolsaq, ótken jyly úsh memlekettik baǵdarlama men 10 ulttyq joba júzege asyryldy. Olar memlekettik josparlaýdyń jańa júiesin engizý aiasynda bekitildi. Túrli kózderden 8,2 trillion teńge bólindi. Onyń 2,8 trillion teńgesi memlekettik biýdjetten bólindi", - dedi Jamaýbaev.
Sondai-aq Qarjy ministrliginiń basshysynan Qazaqstandaǵy biýdjettiń igerilmeýine qarsy qoldanylyp jatqan sharalar týraly suraldy.
"Birneshe trillionnan astam biýdjet aqshasy tiimsiz paidalanyldy. Aldaǵy ýaqytta mundai jaǵdai qaitalanbaýy úshin qyzmetkerler jazalana ma?" - dep surady senator Amangeldi Tólemisov.
"Sandardy naqtylai keteiin. 8,2 trillion teńge, onyń barlyǵy - memleket qarjysy emes. 2,8 trilliony - respýblikalyq biýdjetten bólingen qarjy. Qalǵany - jeke investitsiia men qaryz qarajat. Árine, monitoring júrgizip jatyrmyz. Biz Joǵarǵy esep palatasynyń qorytyndylary men usynystaryn taldaimyz, joǵary laýazymdy tulǵalardy jaýapqa tartamyz. Qazir 113 adam, onyń ishinde 82 joǵary laýazymdy tulǵa jaýapkershilikke tartyldy", - dep jaýap berdi Qarjy ministrliginiń basshysy.
