2018 jyly Qazaqstanda orman órti boiynsha 358 jaǵdai tirkelip, 120 991 gektar aýmaq órtengen. Bul týraly orman sharýashylyǵy jáne janýarlar dúniesi komitetiniń baspasóz hatshysy Sáken Dildahmet habarlady.
Dildahmettiń Facebook paraqshasynda jariialanǵan derekke sai, órtengen 120 991 ga aýmaqtyń 43 gektarǵa jýyǵy – ormanmen kómkerilgen aýdan.
Órt bolǵan barlyq oqiǵanyń 70-ine dala órtiniń ormanǵa kóshýi sebep. "Úsheýi – orman paidalanýshylardyń, ekeýi – túrli kásiporyndar men uiymdardyń, 13-i jergilikti jurtshylyq kinásinen bolǵan", dep jazady ministrlik ókili.
Dildahmettiń jazýynsha, naizaǵai tigen soń bastalǵan órt sany – 168. Ol ormanda bolǵan 103 órttiń sebebi anyqtalmaǵanyn jazady.
Resmi derek boiynsha, Qazaqstanda byltyr orman 2017 jylmen salystyrǵanda 1,6 ese az órtengenimen, janyp ketken aýmaq kólemi 9 ese artqan.
Ministrlik byltyr bolǵan iri orman órtterinen soń 25 laýazymdy qyzmetkeri jaýapqa tartylǵanyn aitady. Olarǵa sógis jariialanǵan. Budan bólek ormandaǵy órt qaýipsizdigi erejelerin saqtamaǵan 157 qyzmetker tártiptik jaýapqa tartylǵan.
