2021 jyly Teńiz, Qashaǵan, Qarashyǵanaq ken oryndarynyń operatorlary memleket biýdjetine 7,5 mlrd dollar tikelei tólem jasady. Bul jaiynda QR Premer-Ministri Álihan Smaiylovtyń Májilis depýtattarynyń saýalyna bergen jaýabynda aitylǵan, dep habarlaidy QazAqparat.
«2021 jyly 3 iri operatordyń qyzmetinen memlekettik biýdjetke jalpy tikelei tólem kólemi 7,5 mlrd dollardan asyp tústi», - delingen Úkimet basshysynyń jaýabynda.
Premer-Ministrdiń dereginshe, «Teńizshevroil» kompaniiasy elimizdiń biýdjetine 4,5 mlrd dollar tóledi.
Respýblika Qarashyǵanaq jobasynan 2,6 mlrd dollar aldy.
Onyń ishinde profit-oil (investordyń kirisin qalyptastyratyn jáne respýblika biýdjetine ketetin munaidyń bóligi) túrindegi 1,98 mlrd dollar - Ulttyq qorǵa, jáne salyq túrinde 0,65 mlrd dollar - jergilikti jáne respýblikalyq biýdjetke aýdaryldy.
Al Soltústik Kaspii jobasynan elimizge 0,4 mlrd dollar (basym tólem túrinde 274 mln dollar jáne profit-oil túrinde 170 mln dollar) tústi.
