BUU esirtki men qylmys jónindegi basqarmasynyń aimaqtyq úilestirýshisi Danilo Kampisi adam saýdasy men zańsyz migratsiianyń saldary, oǵan qarsy turý mańyzy týraly pikirimen bólisti, dep habarlaidy QazAqparat.
«Adam saýdasy men zańsyz migratsiia máseleleri óte ózekti. Búkil álemde tabys kózi maqsatynda milliondaǵan jan adam saýdasy qurbanyna ainalyp, zańsyz migratsiiany basynan ótkizedi. Adam saýdasyna qatysty óte qaterli isterdiń ushyǵy uiymdasqan qylmystyq toptarǵa baryp tireledi. Qylmystyq toptar adamdardy seksýaldy eksplýatatsiia nemese kúshtep jumysqa tartý úshin paidalanady. Jalpy, Migratsiia jónindegi halyqaralyq uiymnyń málimetine súiensek, zańsyz migratsiia júiesinde álem boiynsha 5-7 mlrd AQSh dollary ainalymda. Demek, mundai transulttyq qylmystardyń túbinde zańsyz tabys jatqanyn kórip otyrmyz», - dedi ol elordada ótip jatqan óńirlik seminarda.
BUU EQB ókiliniń aitýynsha, álem memleketteriniń qarjylyq barlaý qyzmetteri mundai qylmystardyń aldyn alý, jolyn kesý isimen ainalyspaidy.
«Sol sebepti, Nur-Sultanda ótip jatqan bul sharaǵa QR Bas prokýratýrasynyń Quqyq qorǵaý organdary akademiiasynyń ókilderiniń qatysyp otyrǵanyna qýanyshtymyz. Iaǵni, Ortalyq Aziia memleketteri bul máselege bei-jai qarap otyrǵan joq. Mundai aýyr qylmystardyń jolyn kesý úshin bizge halyqaralyq yntymaqtastyq kerek», - dedi Danilo Kampisi.
Aita ketsek, aldaǵy eki kúnde Nur-Sultan qalasynda quqyq qorǵaý organdarynyń akademiiasy BUU EQB-men birlesip «Adam saýdasy men zańsyz migratsiia ainalymyndaǵy zańsyz qarjy aǵynynyń jolyn kesý maqsaty boiynsha halyqaralyq jáne óńirlik yntymaqtastyq» taqyrybynda óńirlik seminar ótkizip jatyr. Seminarǵa Aýǵanstan, Iran, sondai-aq Qazaqstan, Qyrǵyzstan, Pákistan, Tájikstan, Túrikmenstan jáne Ózbekstan prokýratýra organdarynyń jáne qarjy barlaý bólimsheleriniń ókilderi qatysyp jatyr. Sonymen qatar, jiynda spikerler retinde BUU EQB halyqaralyq sarapshylary, sondai-aq quqyq qorǵaý organdary akademiiasynyń sarapshylary sóz sóileidi.
QR Bas prokýratýrasynyń Quqyq qorǵaý organdary akademiiasynyń málimetine súiensek, búkil álem boiynsha shamamen 40 mln adam quldyqta. Qazaqstan jahandyq quldyq indeksinen 2017 jyly 167 eldiń arasynan 83 orynnan kóringen.
