Foto: Gov.kz
Býrabai aýdanynyń prokýratýrasy Býrabai kentindegi Sáken Seifýllin atyndaǵy orta mektepte tamaqtandyrýdy uiymdastyrý barysynda eleýli zańbuzýshylyqtardy anyqtady, dep habarlaidy Ult.kz.
Tekserý nátijesinde kámeletke tolmaǵandardyń ómiri men densaýlyǵyna qaýip tóndiretin birqatar faktiler belgili boldy.
Prokýratýra málimetinshe, konkýrs jeńimpazy dep tanylǵan jetkizýshi konkýrsqa qatysý kezinde óziniń biliktiligi týraly jalǵan málimetter usynyp, naqtysynda jumys istemeitin qyzmetkerlerdi — aspazdar men daiashylardy kórsetken.
Konkýrsty jeńip alǵannan keiin jetkizýshi mekteptegi tamaqtandyrý qyzmetin is júzinde kórsetpei, óz mindettemelerin tiisti ókilettigi men ruqsat qujattary joq úshinshi tulǵaǵa zańsyz túrde bergen. Al bul tulǵa jumystardy oryndaýǵa alkogoldi shamadan tys tutynatyn, sondai-aq osy sebeptermen buryn ata-analyq quqyqtarynan aiyrylǵan adamdardy tartqan.
Sonymen qatar mektep ákimshiligi jetkizýshiniń biliktilik talaptaryna sáikestigin tiisti deńgeide teksermei, ony mekteptegi tamaqtanýdy uiymdastyrýǵa jol bergen. Bul jaǵdai oqýshylardyń ómiri men densaýlyǵyna áleýetti qaýip tóndirgeni atap ótildi.
Prokýratýranyń usynýy negizinde jetkizýshimen jasalǵan shart buzylyp, ony memlekettik satyp alýdyń josyqsyz qatysýshysy dep taný týraly sotqa talap aryz berildi. Sondai-aq mektep direktory atqaryp otyrǵan qyzmetinen bosatylyp, konkýrs komissiiasynyń músheleri men aýdandyq bilim bóliminiń qyzmetkeri tártiptik jaýapkershilikke tartyldy.
