Azdaǵan kúnderden soń qoi jylyna qosh aityp, meshin jylyna aiaq basamyz. Qarbalasqa toly jyl da qardai erip, kóz aldymyzda joǵalyp barady.
Jyl basynda kezekten tys Prezident sailaýyn ótkizip, 97,7%-ben 25 jyl el basqarǵan Nursultan Ábishulyn taǵyna qaita otyrǵyzdyq; tól teńgemizdi erkin ainalymǵa jiberip, artynsha 20 myń teńgelik kýpiýrany qaltaǵa bastyq; úshinshi qazaq ǵaryshkerin aspanǵa ushyryp, «Halyq qaharmany» degen ataqpen kútip aldyq; «Qazaqta buryn memleket bolǵan joq» dep kósemsigen Pýtinniń sóziniń qaitarymyndai Qazaq handyǵynyń 550 jyldyǵyn toiladyq. El bolyp toilaǵan eleýli oqiǵa barsha alash jurtynyń rýhyn kóterip, bir serpiltip tastaǵany anyq. Irili-usaqty oqiǵalardy tize bersek, osylai jalǵasa beredi. Bári de tarih qoinaýyna ketti. Bul jyly Gerold Belger, Didahmet Áshimhan, Tursynbek Kákishev, Ábish Kekilbaev syndy alyptardan airylyp, qasterli qara jer «endi osyndai Ul taba alar ma ekenmin» degendei aýyr kúrsindi. Batyrhandai talantty máńgilik jer qoinyna tapsyryp, Sailaýbektei saiqymazaqtardy kieli sahnada tairańdattyq.
Aýktsionǵa qoiylǵan jerimiz ben qazba bailyqtardan túsken paidanyń hám Álibi jeńip shyqqan Jamalievtiń milliondaǵan qarjy turatyn bar múlkin tárki etkennen ekonomikamyzǵa, halqymyzǵa qanshalyqty paida tietini de belgisiz. Sonda da biz Sabyr men Senimnen airylmadyq. Pýtin sózi men kúligimizdi krespen baýyzdaǵysy kelgen aiýtekti jaýyzdardyń Qyzyl alańǵa shyǵyp, elimizdiń Táýelsizdigin joqqa shyǵarý aktsiiasyn ótkizýi – jigerimizdi janymasa, rýhymyzdy jyqqan joq. Tam-tumdap atajurtqa oralǵan oralmandardyń sany, «shahid bolamyn» dep shala búlinip Siriia asqan júzdegen qandasymyzdyń ornyn toltyra almasy anyq. «Qan tilengen jat eldik bult-kisilerdiń» ata dinimizge aýyz salyp, ańqaý aǵaiyndy jolynan adastyryp áketkenine ne dersiń?! Dinimiz búlingenmen, dińimiz myqty edi ǵoi. Bul synaqtan da ótermiz.
Iá, qoidai momyn halyqty eski jyl esirkei qoimady. Ótken kúnge ókpesin aityp qoshtasqaly turǵan bu qazaq, erteńin Táńirge ǵana tapsyryp otyr. Otyz qanat Ordamyzdyń ishinde beibit tirlik bolǵanmen, álemniń ár búiirinen estilgen kók zeńbirek, kóp myltyqtyń úni qalyń buharanyń úreiin týǵyzyp otyr. Onyń ústine devalvatsiia dep dúrlikken eldiń ýaiymy bir bólek. Dollar baǵasynyń aspanǵa shaýyp, teńgemizdiń qunsyzdanýy – halyqty alańdatpai qoiǵan joq.
Sońǵy málimetterge súiensek, Qazaqstannyń syrtqy qaryzy 7,68 trillionnan asyp jyǵylady eken. Munyń bári qarapaiym halyqtyń tynyshyn ketireri sózsiz. Degenmen qanshama qiyndyqty bastan ótkergen qazaq úshin bul kúnder de kórgen tústei óte shyǵady dep senemiz. Osyndai qiyn kezeńde halyqty biriktiretin kúsh – sabyr men senim. Erteń-aq eldiń esin alǵan daǵdarysty eńserip, etek-jeńimizdi jinap alamyz. Laiym keler jyl berekege, qýanyshqa bastap, qazaq jurtynyń eńsesi biik, rýhy asqaq bolsyn!
Qudaiǵa shúkir, qazir qazaq qoǵamynyń saiasi saýaty ósti, ulttyq sanasy oiandy. Qazaqstannyń ár túkpirindegi qazaq memlekettik mańyzdy máselelerge ún qatyp, belsene aralasyp júr. Muny áleýmettik jelilerdegi jazbalardan jáne eldegi túrli oqiǵalardan baiqaýǵa bolady.
Osy oraida, halyqtyń tanym-biligin qalyptastyrýda, saiasi bilimin arttyrýda qyzmet etip kele jatqan «Ult» portalynyń da ózindik eńbegi bar dep bilemiz. Jyl basynan beri ult múddesi týrasynda kóptegen mańyzdy maqalalar jariialanyp, ózekti máseleler kóterildi. Ult ziialylary sóz alar mártebeli minberge ainaldy.
Qurylǵanyna úsh jyldai ýaqyt ótse de, qazir bizdi Qazaqstannan bólek, Monǵoliia, Qytai, Túrkiia, Resei, Niderlandy, AQSh, Germaniia elderinen oqyrmandar oqyp otyrady. Muny biz Google Analytics servisi arqyly kórip, bilip otyrmyz. «Ult» portaly búginge deiin talmai jazyp, maqala joldap kelgen avtorlardyń barlyǵana alǵys aitady. Bizdiń alań barlyǵyńyz úshin ashyq. Kókeide júrgen máselelerińiz, mazalap júrgen oilaryńyz bolsa, maqala jazyp, portal poshtasyna joldańyzdar (1ult.kz@gmail.com).
Men buǵan deiin jańashyl qazaq jastarynyń ádebi-mádeni, aqparattyq-tanymdyq ordasyna ainalǵan «Massaget.kz» saitynda kontent-menedjer, keiinnen redaktor bolyp qyzmet jasadym. Ol jerde eki jyldai jumys istep, Ult portalynyń bas redaktory, aqyn Aqberen Elgezektiń shaqyrýymen osynda keldim. Aqberen aǵa Aibol Islamǵaliev ekeýmizge sait tizginin tapsyryp, senim bildirdi. Ózi memlekettik jumysqa aýysqannan keiin, bar jaýapkershilik bizge júktelip otyr.
Árine, «Ult» portaly sekildi úlken internet-basylymdy tájiribesi tolysqan, qalamy júirik jýrnalisterdiń birine amanattap ketse bolar edi. Biraq aǵamyz «Aqyndyqtyń negizi – azamattyq» ekenin aityp, tizgindi bizge usyndy. Sondyqtan ulttyń júgi arqaǵa aýǵandai, úlken jaýapkershilikti sezinip otyrmyz.
Aqberen aǵa «aqyn» dep sońynan ergen jastarmen áńgimelesken kezde: «Aqyn – qairatker bolý kerek. Qajet bolsa ulty úshin basyn báigege tigýi qajet, eshkimge jaltaqtamaýy kerek» dep jii aitady. Qazaq jastarynyń qaisy bolsyn ultshyl bolsa, el erteńine alań kóńilmen qarap, oiy ornyqty, sózi salmaqty shyqsa deidi. Jańa ziialy qaýymnyń qalyptasýy bizderdei jastardan bastalatynyn baǵamdap, baǵdar nusqaidy. Ýaqyt almasyp, bizdiń de elge sóz aitar kezimiz kelgende neden aianyp qalaiyq.
Qadirli oqyrman, «bolar eldiń balasy birin biri batyr deitini» ras bolsa, sizderdiń tarapyńyzdan qoldaý bolady dep senemiz. Ult taǵdyry – urpaqqa amanat. Ǵasyrlar boiy ańsaǵan Táýelsizdikti saqtap qalý – siz ben bizge paryz. Tatý bolaiyq, Ultpen birge bolaiyq!
Qurmetpen, Sherhan Talap
.jpg)
