Foto: primeminister.kz
QR Premer-Ministri Álihan Smaiylovtyń tóraǵalyǵymen ótken Úkimet otyrysynda Qaraǵandydaǵy Kostenko atyndaǵy shahtada oryn alǵan órtke qatysty jaǵdai qaraldy, dep habarlaidy "Ult aqparat" primeminister.kz saityna silteme jasap.
Álihan Smaiylov eń aldymen Úkimet atynan jáne jeke óziniń atynan qaza tapqandardyń týystary men jaqyndaryna qaiǵyra kóńil aitty.
Budan keiin Ministrler kabinetiniń músheleri marqum bolǵan kenshilerdi bir minýt únsizdikpen eske aldy.
«Barlyq zardap shekkenderge tezirek saýyǵyp ketýin tileimin. Densaýlyq saqtaý ministrligi emdelip jatqan árbir kenshiniń jaǵdaiyn baqylaýda ustasyn. Qaza tapqandardyń otbasylaryna qajetti kómek kórsetilip jatyr. Memleket basshysy tiisti tapsyrmalar berdi», — dedi Premer-Ministr.
Tótenshe jaǵdailar ministri Syrym Sháriphanov málim etkendei, 28 qazanǵa qaraǵan túni Kostenko shahtasynda 700 metr tereńdikte órt shyǵyp, odan keiin metan-aýa qospasy jarylǵan. Oqiǵa ornyna dereý Kásibi áskerilendirilgen avariialyq-qutqarý qyzmetteriniń respýblikalyq ortalyq shtaby Qaraǵandy filialynyń kúshteri jumyldyryldy.
Apat kezinde aýysymda 252 kenshi bolǵan, onyń 5-eýin qutqarý qyzmetiniń kúshterimen tabylyp, jer betine shyǵaryldy, 200-den astam adam óz betinshe kóterildi. Izdestirý-qutqarý jumystary kezinde 45 kenshiniń denesi jáne aldyn ala boljam boiynsha qaza tapqan 46-shy adamnyń dene bólshekteri tabyldy.
Izdeý jumystary elektr qýatynyń bolmaýy, taý-ken qazbalarynyń uzyndyǵy jáne kóptegen buzylǵan mehanizmderdiń bolýy saldarynan qiyndaǵany aityldy. Jekelegen sý basqan qazba oryndaryna qol jetkizý qiyn bolǵan.
Qazirgi tańda ashyq órt oshaqtary joq, gaz jaǵdaiy qalypty. Shahta qyzmetin qalpyna keltirý úshin taý-ken qazbalaryn zertteý jáne jekelegen ýchaskelerde sý sorý jumystary júrgizilip jatyr.
Apat sebepterin tekserý sheńberinde Úkimettik komissiia músheleri shahtaǵa tústi. Nátijesinde óte mańyzdy buzylýlar anyqtaldy: taý-ken qazbalarynda shahta jabdyqtary jyljyp ketken, 15-ten astam oqshaýlaǵysh bógetter men jeldetý qondyrǵylary qiraǵan. Tergeýge Qazaqstannan, jaqyn jáne alys shetelderdiń saraptamalyq uiymdar tartyldy.
Óz kezeginde Qaraǵandy oblysynyń ákimi Ermaǵanbet Bólekpaev baiandama jasady.
Álihan Smaiylov Memleket basshysy Kostenko shahtasynda kenshilerdiń qaza bolýyna bailanysty tergeý jumystaryn júrgizip, «ArselorMittal Temirtaý» kompaniiasymen investitsiialyq yntymaqtastyqty toqtatýdy tapsyrǵanyn atap ótti.
«Biyl tamyz aiynda da "ArselorMittal Temirtaýda" osyndai apat oryn alǵan bolatyn. Ol kezde 5 shahter qaza tapty. Kóptegen adam ólimine ákep soqqan apat óndiristegi qaýipsizdik talaptarynyń saqtalmaýymen tikelei bailanysty. Bul – birinshi kezekte, kásiporyn basshylyǵynyń kinási», — dedi ol.
Premer-Ministr olar kompaniia jumysynan ózderin shettetip tastaǵanyn, mundai áreketsizdiktiń saldary birneshe jyldar boiy qaiǵyly jaǵdailarǵa ákep soqtyryp kele jatqanyn aitty.
«Kompaniia óz mindettemelerin oryndaǵan joq. Qazirgi tańda, “ArselorMittal Temirtaý” kompaniiasyn Qazaqstannyń paidasyna berý rásimderi aiaqtalý satysynda», — dedi Úkimet basshysy.
Onyń aitýynsha, arnaiy Komissiia apattyń sebepterin jan-jaqty tekserip, oǵan kináli adamdardy anyqtaý jumystaryn jalǵastyrady.
«Qaraǵandy oblysynyń ákimdigi men Tótenshe jaǵdailar ministrligi apatty joiý jóninde sharalar qabyldaýy tiis. Eń bastysy – qaza tapqandardyń otbasylaryna barlyq kómekti kórsetip, zardap shekkenderdiń densaýlyqtaryn qalpyna keltirý. Osyndai qiyn jaǵdaida eshkim de nazardan tys qalmaidy», — dep qorytyndylady sózin Álihan Smaiylov.
