Ýkrainanyń Resei basyp alǵan jerlerinen ózge aimaqtarynyń bárinde áýe dabyly qaǵyldy. Jergilikti bilik Kiev, Harkov, Zaporoje, Krivoi Rog jáne taǵy basqa qalalarda jarylys bolǵanyn habarlap jatyr.
VVS tilshisi de Kievte jarylys kóbeigenin aitty. Onyń sózinshe, jarylystan keiin elektr qýaty sónip, bailanys óshken.
Keiinirek Kiev meri Vitalii Klichko "infraqurylym nysandaryna jasalǵan soqqy saldarynan Kievtiń bir bóligi elektr qýatynan ajyraǵanyn, kei aýdandarǵa sý berilmei jatqanyn" habarlady.
Harkov meri Igor Terehov Telegram kanalynda qalada eki jarylys bolǵanyn jazdy. Onyń málimetinshe, qalanyń mańyzdy infraqurylymdary atqylanǵan. Harkov metropoliteni jumysyn toqtatqan, trolleibýstar men tramvailar da toqtaǵan.
Qazirgi aqparattarǵa qaraǵanda, Resei áskeri Ýkraina qalalaryn S-300 zymyran keshenimen atqylaǵan. Harkov oblysynyń basshysy Oleg Sinegýbovtyń sózinshe, zymyran Reseidiń Belgorod qalasy mańynan atylǵan.
Zaporoje, Vinnitsk, Kirovograd, Poltavsk jáne Dnepropetrovsk oblystarynda da jarylys bolǵany jaily habarlandy.
Tańǵy jarylystardan keiin Zaporoje qalasynda elektr qýaty ajyraǵan. Jergilikti biliktiń aqparatyna qaraǵanda, Resei áskeri mańyzdy infraqurylym nysandaryn nysanaǵa alǵan.
"Túnde Resei áskeri dúrkindetip atatyn zymyran júiesi jáne artilleriiasymen Dnepropetrovsk oblysyn atqylaǵan, sondai-aq kamikadze drondarmen shabýyl jasaǵan" dep habarlady Dnepropetrovsk oblystyq áskeri ákimshilik basshysy Valentin Reznichenko.
"Gradpen" atqylaý nátijesinde Marganets qalasynda bir áiel qaza bolǵan. "Otyzǵa jýyq kóp qabatty úige, elektr symdaryna zaqym keldi" deidi Reznichenko. Kamensk aýdanynda kamikadze drondar energetikalyq infraqurylymyna nuqsan keltirgen.
Resei qorǵanys ministrligi ázirge bul shabýyl týraly túsinikteme bergen joq. Resei áskeri 10 qazannan beri Ýkrainanyń infraqurylymyna shabýyl jasap keledi. Máskeý muny Qyrym kópirine jasalǵan shabýylǵa jaýap dep túsindirgen. Resei qorǵanys ministrligi soqqy áskeri nysandarǵa jasalatynyn aityp kelgen.
Ýkraina qorǵanys ministri German Galýshenko Resei shabýyly saldarynan Ýkraina energetika infraqurlymynyń 40 paiyzǵa jýyǵyna zaqym kelgenin habarlaǵan.
