23 sáýir – Ekinshi dúniejúzilik soǵystyń has batyry, partizan jazýshy Qasym Qaisenovtyń týǵan kúni. Biyl Qazaqstannyń Halyq Qaharmanynyń 103 jyldyǵy bolyp otyr, dep habarlaidy QazAqparat.
Jasyndai tiip jaýdy jairatqan, qalam qudyretimen soǵys qasiretin, zamana tynysyn búkpesiz jetkizgen Qasym Qaisenov 1918 jyldyń 23-i sáýirinde Shyǵys Qazaqstan oblysy Ulan aýdany Asýbulaq aýylynda dúnie esigin ashqan. Sol aýyldaǵy mektepte bilim nárimen sýsyndaǵan soń Óskemendegi saiasi-aǵartý tehnikýmyna oqýǵa qabyldanǵan. 1938 jyly ondaǵy oqýyn oidaǵydai támámdap, tehnikým mańynan ashylǵan caiasi aǵartý kýrsyna basshylyq etýge taǵaiyndalady. 1938-39 jyldary Pavlodar oblystyq oqý bóliminde inspektorlyq qyzmet atqarǵan soń 1939 jyly áskeri-barlaýshylar mektebine qabyldanǵan. Ol oqý ornyn 1941 jyldyń kúzinde bitirip shyqty.
Sol jyly surapyl soǵysqa attanǵan Qasym Ońtústik-batys maidany shtabynyń qaramaǵyna jiberildi. Qandy maidanda aianbai shaiqasqan batyr kóp ret erligimen kózge túsken. Talai fashistiń janyn jahannamǵa jiberip, 1945 jyly eline aman-esen oralady.
Soǵys aiaqtalǵannan keiin 1945-1946 jyldary Qazaq SSR Joǵarǵy Soveti Prezidiýmy apparatynda referent qyzmetin atqarǵan. 1946-1949 jyldary Jambyl oblysynyń Jýaly, Sverdlov aýdandarynda aýdandyq atqarý komitetteri tóraǵasynyń orynbasary, 1949-1950 jyldar aralyǵynda QazSSR jeńil ónerkásip ministirliginde kadr bóliminde aǵa inspektory qyzmetterin atqarady. 1951-1953 jyldary Qazaqstan Kommýnistik partiiasy Ortalyq Komiteti janyndaǵy partiialyq mekteptiń aýdarmashylar daiarlaityn bólimine oqýǵa jiberiledi. Oqýdy aiaqtaǵan soń uzaq ýaqyt «Qazaq eli», «Jazýshy», «Qainar», baspalarynda redaktor, baspa direktorynyń orynbasary bolyp eńbek etti.
Kórnekti jazýshynyń qalamynan týǵan dúnieler oqyrman qaýymnyń joǵary baǵasyn alǵan. Ol «Jas partizandar» (1954), «Ajal aýzynda» (1959), «Jaý tylyndaǵy bala» (1961), «Jaý tylynda» (1973), «Partizan soqpaqtary» (1978), «Pereiaslav partizandary» syndy kóptegen shyǵarmalar jazdy. Kitaptary áli kúnge deiin asqan qyzyǵýshylyqpen, zor yqylaspen oqylyp keledi.
Erligi eren Qasym Qaisenov «Bogdan Hmelnitskii» ordeni, «Chehoslavakiia partizany», II, III-dárejeli «Za zaslýgi» jáne 2 ret I dárejeli «Uly Otan soǵysy» ordenimen, shetelderdiń jáne Sovet Odaǵynyń medaldarymen sondai-aq Qazaq SSR-niń, Ýkrain SSR-nyń «Qurmet gramotalarymen» marapattalǵan. 1995 jyly 24 sáýirde partizanǵa «Halyq qaharmany» ataǵy jáne armiia polkovnigi degen shen berildi.
Halqynyń qoshemeti men qurmetine bólengen partizan jazýshy 2006 jyldyń jeltoqsan aiynda 88 jasynda dúnieden ótti.
