Londonda Vetnamnan kelgen 39 migranttyń ólimine sebepshi bolǵan tórt adam sottaldy, dep habarlaidy Euronews agenttigi.
Tórt aiyptalýshy 2019 jyly Angliiada júk kóliginiń tirkemesinen tabylǵan 39 migranttyń ólimine sebepshi bolǵany úshin 13 jyldan bastap 27 jylǵa deiin jaza arqalady.
Eki negizgi aiyptalýshy - Soltústik Irlandiianyń týmasy, 41 jastaǵy júrgizýshi Ronan Hiýz - 20 jylǵa, 43 jastaǵy Rýmyniia azamaty George Nika - 27 jylǵa sottaldy.
Taǵy eki júrgizýshiniń bireýi 13 jyl 4 aiǵa, ekinshisi 18 jylǵa bas bostandyǵynan aiyryldy.
Eske sala keteiik, 2019 jyldyń 23 qazanynda Ulybritaniianyń Esseks graftyǵyndaǵy Greis qalasynda kólik tońazytqyshynan 31 erkek pen segiz áieldiń máiiti tabylǵan edi.
Britaniia politsiiasynyń málimetinshe, adamdarǵa júk kóliginde aýa jetpei, tirkemeniń ishi qatty ysyp ketken.
Qaza tapqandardyń arasynda 26 jastaǵy Fam Thi Tra Mai bolǵan. Ol 22 qazanda otbasyna tynys ala almai jatqanyn aityp, hat joldaǵan.
Politsiia boljamyna sensek, júk kóligi Bolgariiadan kelip, Ýels graftyǵynyń Holihed porty arqyly el aýmaǵyna 19 qazanda kirgen.
Jappai kisi ólimine bailanysty birneshe adam tutqyndaldy.
Keiinnen júk kóliginen denesi tabylǵan 39 adamnyń aty-jóni belgili boldy.
Osyǵan bailanysty Esseks politsiiasy Vetnamǵa baryp, tergeý júrgizdi. Nátijesinde jeti adamǵa aiyp taǵyldy.
