Búgingi tańda Ulybritaniiada anyqtalǵan koronavirýstyń jańa túri álemniń birneshe elderinde – Qytaida, AQSh-ta jáne Eýropa aimaqtarynda taralýda. Onyń Qazaqstanda taralý qaýpi qanshalyqty joǵary? Bul týraly Ortalyq kommýnikatsiialar qyzmetinde ótken brifingide aityldy, dep habarlaidy QazAqparat.
«Mamyr aiy men qyrkúiek aiy aralyǵynda tabylǵan 130 synamaǵa genetikalyq zertteý júrgizdik. Virýstar arasynan britandyq mýtatsiia tabylǵan joq. Bul virýstar Germaniia, Ispaniia, Ýkraina, Resei, AQSh jáne Qytaida tabylǵan virýstarǵa uqsas. Búgingi kúni biz kelesi genetikalyq testileý júrgizý úshin qazan men jeltoqsan aralyǵynda aimaqtardan tabylǵan synamalardy jinap jatyrmyz», - deidi QR DSM sanitarlyq-epidemiologiialyq baqylaý komitetiniń tóraiymy Aijan Esmaǵambetova.
Sondai-aq, ol Britaniia men Qazaqstan arasynda tikelei bailanys joq ekenin jetkizdi.
«Esterińizde bolsa, 6 qazannan bastap shetelden keletinderge PTR testten ótý týraly talap qoiylǵan. PTR testten ótpegender mindetti túrde karantindik statsionarǵa ornalasyp, PTR test tapsyryp, nátijesin sol jerde kútedi. Negizi virýstardyń mýtatsiialanýy – qalypty jaǵdai. Koronavirýs genetikalyq turǵydan adamǵa qatysy joq, jarqanattarǵa qatysy bar virýs. Ol bir jyl boiy ózgeriske ushyrap, beiimdelip keledi. Ol mýtatsiialanǵan virýs jáne mýtatsiialana beredi», - deidi Aijan Esmaǵambetova.
