Qazaqstanda balyq ósirý isi jolǵa qoiylyp, bul baǵytta aýqymdy jumystar atqarylyp keledi. QR Úkimetiniń aqparatyna súiensek, sońǵy 7 jylda balyq kólemi 9 ese, iaǵni 800 tonnadan 7,4 tonnaǵa deiin ósken. Bul balyq sharýashylyǵymen ainalysatyn mamandar men balyqty brakonerlerden qorǵaityn inspektorlardyń eńbegi.
Balyqty jasandy ósirý boiynsha Túrkistan oblysy kóshbasshy bastap tur. Elimizdegi balyqtyń 5 myń tonnasy (68,7%) osy aimaqqa tiesili. Al Almaty oblysynda 1000 tonna (12,8%) balyq óndireledi eken. Qalǵan balyq úlesin Soltústik Qazaqstan oblysy men Shyǵys Qazaqstan oblysy enshilegen. Osy balyq sharýashylǵy damyp turǵan aimaqtarymyzda brakonerler de tynym tappaidy.
Máselen, jaqynda ǵana Alakólde zańsyz aýlanǵan balyqty tiep, alańsyz ketip bara jatqan eki kólik toqtatyldy.
Ustalǵan eki kóliktiń júksalǵyshynan tártip saqshylary 130 kelige jýyq balyq tárkiledi. Alakól aýdanynyń politseileri «Brakoner» jedel aldyn alý is sharasyn ótkizý barysynda «Niva» jáne «ÝAZ» markaly avtokólikterin toqtatqan. Eki kólik júrgizýshileri 130 kilogramǵa jýyq balyqqa qatysty eshqandai tiisti qujattar kórsete almaǵan.
Kóliktegi balyqtar tárkilenip, tiisti qabyldaý oryndaryna ótkizildi. Balyqtan túsken qarajat memleket paidasyna aýdarylady. Sonymen qatar, qazirgi ýaqytta atalǵan derek boiynsha memleketke keltirilgen materialdyq shyǵyn anyqtalýda. Tiisti tekserýlerden keiin naqty protsessýaldyq sheshim qabyldanady.
Esterińizge sala keteiik, Almaty oblysynda «Brakoner» jedel aldyn alý is-sharasy 31 tamyzǵa deiin jalǵasady.
Atalǵan sharanyń maqsaty – tabiǵat qorǵaý zańnamasynyń saqtalýyn qadaǵalaý, quqyq buzýshylyqtardy boldyrmaý, tabiǵi bailyǵymyzdy qorǵaý. «Brakoner» jedel aldyn alý is-sharasy barysynda politseiler tabiǵat qorǵaý organdarymen birlesip, turaqty túrde reidter men tekserýler uiymdastyrady. Halyq arasynda túsindirý jumystaryn júrgizip, zań talabynyń qatań saqtalýyn eskertedi.
