Bozjyra shatqalynda qonaq úi kesheni salynbaidy. Bul aqparatty Mańǵystaý oblysy ákimdiginiń baspasóz qyzmeti rastady, dep habarlaidy QazAqparat.
«Joba bastamashysy - «Tethys Aktau IV» JShS-nyń aýyzsha aqparatyna sáikes, Bozjyra shatqalyndaǵy qonaq úi kesheni men etnoaýyl qurylysynyń jobasy investordyń bastamasymen toqtatyldy», - dep atap ótti ákimdikten.
Aita keteiik, 2021 jyldyń basynda óńirdegi ekologiialyq týrizmdi damytý maqsatynda investor usynǵan jobalardyń biri Qaraqiia aýdanyndaǵy Etnoaýyl sapar ortalyǵy bolǵan edi. Bastapqyda investor Bozjyra shatqalyndaǵy Jabaiushqan qoryqshasynyń aýmaǵynda jobany iske asyrýdy usynǵan. Biraq, atalǵan aýmaq erekshe qorǵalatyn aimaq bolǵandyqtan Memleket basshysy Úkimetke jobany júzege asyrý ornyn qaita qaraýdy tapsyrdy.
Mańǵystaý oblysy ákimdigi Mádeniet jáne sport, Ekologiia, geologiia jáne tabiǵi resýrstar ministrlikterimen birlesip, qoǵam ókilderimen, ardagerlermen, ekoqorǵaýshylarmen, ǵalymdarmen, ekologiia, biologiia salasyndaǵy sarapshylarmen birqatar keńester men kezdesýler ótkizip, jobany Bozjyra shatqalynan 4 shaqyrym qashyqtyqta, qoryqshadan tys jerde júzege asyrý týraly sheshim qabyldandy.
Investor topyraqtyń geologiialyq jaǵdailaryn anyqtaý úshin injenerlik-geologiialyq izdestirý jumystaryn júrgizip, qoldanystaǵy greider joldy qalpyna keltirdi.
«Buǵan qosa, investor Mańǵystaý oblysynyń ekologiialyq týrizm erekshelikterin eskere otyryp, ony tabysty júzege asyrý úshin joba tujyrymdamasyna keshendi ózgertýler ázirlep jatyr. Joba tujyrymdamasyna keshendi ózgertýler engizýge qatysty keibir sátterdiń týyndaýyna bailanysty onyń quny 38,6 mlrd teńgeden 39,8 mlrd teńgege deiin aýytqydy. Jobanyń naqty quny oǵan ózgerister engizýmen bailanysty joǵaryda atalǵan protsedýralar aiaqtalǵan soq naqtylanady», - dep atap ótedi ákimdikten.
