Qazaqstan 2018 jyly qosylǵan «Bonn shaqyrýy» jahandyq bastamasy elimizdegi ekologiialyq jaǵdaidy jaqsartýǵa múmkindik beredi. Bul týraly Úkimet otyrysynda QR Premer-Ministri Asqar Mamin aitty, dep habarlaidy QazAqparat.
«NurOtan» partiiasynyń jańa sailaýaldy baǵdarlamasyna sáikes ekologiia, tabiǵat resýrstaryn saqtaý, qalpyna keltirý jáne olardy tiimdi paidalaný máselelerine zor kóńil bólinedi. Kelesi bes jylda 2 mlrd aǵash otyrǵyzý mindeti belgilengen. Parlamentke ósimdikter dúniesiniń obektilerin saqtaý jáne utymdy paidalaný máseleleri jónindegi zań jobasy engiziletin bolady. Ol aǵash kóshetteri men jalpy jasyl ekpelerdi paidalaný kezinde qatynastardy retteýge jáne de zańdylyq pen quqyqtyq tártipti nyǵaitýǵa baǵyttalǵan», - deidi QR Premer-Ministri Asqar Mamin.
Ol Almatyda aǵashtar zańsyz kesilgen rezonanstyq jaǵdai bárimizdiń esimizde ekenin aitty.
«Onyń ústine, mundai jaǵdailar týraly barlyq derlik óńirlerde belsendiler, volonterler kóteredi. Dál osyǵan bailanysty Ákimshilik jáne Qylmystyq kodeksterge shuǵyl tártippen túzetýler ázirlendi, bul túzetýler boiynsha osyndai quqyq buzýshylyqtarǵa qatysty jazalaý qatańdatylady. Kesilgen aǵashtardyń ornyna qaitadan aǵash otyrǵyzý normalaryn da ulǵaitý josparlanǵan. Qolda bar ósimdikter dúniesin saqtap, orman qoryna jáne eldi mekenderde bes jylǵa arnalǵan josparlarǵa sáikes aǵash otyrǵyzý kólemin qamtamasyz etýimiz qajet. Bul Qazaqstan 2018 jyly qosylǵan «Bonn shaqyrýy» jahandyq bastamasynyń aiasynda orman-toǵaily aýmaqtardy kóbeitýge, elimizdegi ekologiialyq jaǵdaidy jaqsartýǵa múmkindik beredi», - deidi ol.
