Germaniianyń ońtústigindegi Rainaý qalasynyń jańa býrgomistri qyzmetine kirise salysymen kútpegen máselege tap boldy. Boiy 198 santimetr bolatyn ákim óz kabinetiniń esiginen óte almai shyqqan. Sonyń saldarynan jergilikti bilik esikti qaita jóndeýge jáne keńse jihazyn aýystyrýǵa 24 myń eýro bólýdi surady, dep habarlaidy ult.kz.
2026 jyldyń kókteminde ótken sailaýda táýelsiz kandidat Kristian Franken Rainaý qalasynyń býrgomistri bolyp sailanǵan edi. Sailaýaldy naýqanynda ol biýdjet qarjysyn uqypty basqarýǵa ýáde berip, «Adam. Ekonomika. Bolashaq» uranymen shyqqan.
Alaida qyzmetine kiriskennen keiin onyń boiy kabinet esiginiń biiktiginen asyp túsetini belgili boldy. Ákimniń boiy – 198 santimetr bolsa, esik oiyǵynyń biiktigi nebári 190 santimetr. Osyǵan bailanysty ákimdik esikti qaita beiimdeýge qosymsha 12 myń eýro bólýdi suraǵan.
Bul bastama jergilikti turǵyndar men BAQ arasynda qyzý pikirtalas týǵyzdy. Ásirese, kópshiliktiń narazylyǵyn esiktiń nebári eki jyl buryn, 2024 jyly ǵana jańartylǵany kúsheitken. Buǵan qosa, ákimniń boiyna sáikes kelmeitin eski jumys ústeli men monitordy aýystyrý úshin taǵy 12 myń eýro qajet ekeni aitylǵan.
Syn kúsheigen soń qala ákimdigi arnaiy túsindirme jariialady. Onda bul shyǵyndardyń eńbek qaýipsizdigin qamtamasyz etý jáne jumys barysynda jaraqat alý qaýpin azaitý maqsatynda josparlanǵany aitylǵan.
Al Kristian Frankenniń ózi qyzmetke kiriskennen keiin esiktiń jaqtaýyna bir ret basyn soǵyp alǵanyn aityp, ázilmen: «Eger jóndeý jasalmasa, maǵan tek dýlyǵa ǵana kómektesedi», – degen.
