Qunanbaimen birge Mekkede qonaqúi saldyrǵan, islam dinin taratýshy Dosjan ishannyń móri endi mýzeige tapsyrylady, dep habarlaidy "Ult aqparat".
Aqtóbe oblysy, Temir aýdanynyń turǵyny buǵan deiin mórdi 1 million teńgege baǵalaǵan bolatyn. Aýdan ákimi Joldas Qalmaǵanbetov mór Shubarqudyq turǵynynan Dosjan ishan urpaǵyna berilgenin, urpaǵy ony mýzeige tapsyratynyn habarlady.
«Árqily sebeptermen jeke adamnyń qolynda saqtalǵan Dosjan Hazirettiń móri zańdy murageri, atanyń shópshegi Asqar Habibýllinniń qolyna tidi. Asqar baýyrymyz Haziretten qalǵan Quran kitaby men mórdi oblystyq mýzeige tapsyrýdy maqsat etip otyr. Mórde arabsha: «Allaǵa qulshylyq etýshi molla Dosmýhammad ibn Qashaq 1248» (Hijra jyl esebimen) dep jazylǵan. Qasietti jádigerdiń el igiligine ainalatyndyǵyna qýanyshtymyn. Babanyń murasyn izdegen baýyrymyz Asqarǵa, sonshama jyl muqiiat saqtaǵan Shubarqudyqtyń turǵynyna shynaiy alǵysymdy bildiremin», - dep jazdy aýdan ákimi J.Qalmaǵanbetov.
Aita keteiik, aýdandaǵy Dosjan ishan meshiti qaita qalpyna keltiriledi. Bul jumys keler jyly aiaqtalady. Sonymen qatar Haziret urpaqtary bulaq kózin ashyp, el igiligine paidalanýǵa berip qoiǵan.
«Bul mór aýyl turǵynynyń qolynda 10 jylǵa jýyq ýaqyt saqtaldy. Biz izdep, jan-jaqtan surap, saqtaýshyny taptyq. Kóp qarjy surady, biraq ortaq kelisimge keldik. Búgin tańerteń kelip, alyp, alǵysymyzdy bildirdik. Ózimizde https://izbasar.kz/ portaly bar. Tek Dosjan Hazirettiń emes, Aqtóbe oblysyndaǵy ishandardy, iri tulǵalardy qosamyz. Qazir ózimizde atamyz ustaǵan Quran kárim bar. Portalda elektrondy nusqasy tur. Dosjan ishan qorymynda ashyq aspan astyndaǵy mýzei bolady. Keler jyly jumys aiaqtalǵan soń mór men kitapty mýzeige tapsyramyn. Qundy jádigerdi tek bir otbasy emes, óskeleń urpaq kórip, bilip ósýi tiis», - dedi Dosjan ishan urpaǵy Asqar Habibýllin.
Dosjan ishannyń eki móri bolǵan. Biri tós móri, ekinshisi qol móri. Qol móri tabylmady.
