Blogerler teńgeniń jańa dizainyn usyndy, - dep habarlaidy Massaget.kz portaly.
Banknotalarda "Alash-Orda" qozǵalysynyń qairatkerleri beinelengen. 500 teńgelik banknotta birtutas Túrkistannyń azattyǵy men táýelsizdigi úshin kúresken Sultanbek Qojanuly, 1000 teńgelikte - aqyn, alashordalyq Mirjaqyp Dýlatov, 2000 teńgede – taǵy bir Alash qairatkeri, aqyn, ádebiettanýshy Ahmet Baitursynuly, 5000-da – saiasi qairatker Mustafa Shoqai, 10 000-da – Kenesary han, al 20 000 teńgede Alash úkimeti negizin qalaýshylardyń biri jáne tóraǵasy Álihan Bókeihan beinelengen.
Bul ideia avtorlary - almatylyq jas-jubailar Dias pen Áigerim Kameridanovtar. Osydan tórt jyl buryn olar áleýmettik jelide "Belgisiz Qazaqstan" avtorlyq blogyn ashqan. Bul jobada olar elimizdiń mádenieti, salt-dástúri, tarihy týraly qyzyqty maqalalar men beinerolikterdi bólisedi.
Diastyń aitýynsha, banknottardyń kóbinde alashordalyqtar beinelengen. Avtorlar dál osy tulǵalar qazirgi qazaq memlekettiliginiń negizin qalaǵanyn atap ótti.
"Biraq keńes ókimeti kezeńinde olar negizsiz halyq jaýy atandy. Olar týraly estelikterdi jańǵyrtý arýaqtary (rýhy– esk.) aldyndaǵy, keler urpaq aldyndaǵy paryzymyz dep bilemin. Al 10 000 teńgelik banknotta qazaqtyń sońǵy hany – Kenesary beinelengen", - dep tolyqtyrdy jigit.
Ideiany júzege asyrýǵa grafikalyq dizainer Elnora Matjanova men videoinjener Azamat Serikbaev kómektesken.
