Qazaqstanda 16 jasqa tolmaǵan balalarǵa áleýmettik jelilerde akkaýnt ashýǵa tyiym salý josparlanyp otyr. Bul norma onlain-platformalardyń qyzmetin retteitin maquldanǵan zań jobalaryna engizilgen, dep habarlaidy ult.kz.
Jańa talaptar kámeletke tolmaǵan paidalanýshylarmen qatar tanymal blogerlerge, onlain-kýrs avtorlaryna jáne ezoterika salasynda qyzmet kórsetetinderge de qatysty bolady.
Áleýmettik jelilerde taǵy qandai ózgerister bolady?
- Blogerler tizilimi jasalady. Ýákiletti organ jazylýshylar sany 5 myńnan asatyn onlain-platforma paidalanýshylarynyń arnaiy tizimin júrgizedi.
- Bilim berý kontentin jasaýshylar diplomyn kórsetýge mindetteledi. Oqý kýrstary men bilim berý baǵytyndaǵy materialdar jariialaityn avtorlar óz paraqshalarynda bilimi týraly málimetti kórsetýi kerek. Ol naqty diplommen nemese sertifikatpen rastalýy tiis.
- Ezoterikalyq qyzmetterge arnaiy belgi qoiylady. Qazaqstan zańnamasynda alǵash ret «okkýlttik qyzmetter» uǵymy resmi túrde bekitilmek. Mundai mazmundaǵy barlyq kontentke onyń tek oiyn-saýyq maqsatynda usynylatyny, ǵylymi nemese praktikalyq turǵydan dáleldenbegeni týraly eskertý ornalastyrý mindetteledi.
Osylaisha, jańa zań jobalary qabyldansa, Qazaqstandaǵy áleýmettik jelilerdiń jumys tártibi ózgerip, paidalanýshylar men kontent avtorlaryna qoiylatyn talaptar kúsheiedi.