Foto: videodan skrinshot
Qarjylyq monitoring agenttiginiń Astana qalasy boiynsha departamenti blogerler Erbolat Janábilov pen Elmira Tólegenovaǵa qatysty zańsyz kásipkerlik jáne qylmystyq jolmen alynǵan aqsha qarajatyn zańdastyrý faktileri boiynsha sotqa deiingi tergep-tekserýdi aiaqtady, dep habarlaidy Ult.kz.
Tergeý derekterine sáikes, Instagram áleýmettik jelisinde 15 millionnan astam jazylýshysy bar erli-zaiypty blogerler 2025 jyly onlain-kýrstardy satý jeleýimen zańsyz shema uiymdastyrǵan. Kýrstardy satyp alýǵa basty túrtki – qymbat syilyqtar utysyna qatysý múmkindigi bolǵan.
Anyqtalǵandai, taratylǵan beinematerialdardyń basym bóligi ashyq derekkózderden, sonyń ishinde YouTube platformasynan alynǵan. Kýrstardyń naqty bilim berý qundylyǵy bolmaǵan jáne olar zańsyz lotereia qyzmetin jasyrý úshin paidalanylǵan.
Júlde qory blogerlerdiń jeke qarajaty esebinen emes, onlain-kýrstarǵa tólem jasaǵan qatysýshylardyń aqshasy arqyly qalyptastyrylǵan. Sonymen qatar elektrondy «sáttilik barabanynyń» parametrlerine ózgeris engizilip, 5 000 teńgelik júldeni utyp alý yqtimaldyǵy ádeii arttyrylǵan, al qundy syilyqtardy alý múmkindigi tómendetilgen.
Kúdiktiler eń kóp repost jasaǵan qatysýshyǵa 11-avtokólik berilgeni jóninde jariia túrde málimdegenimen, is júzinde jeńimpaz anyqtalmaǵan jáne syilyq tabystalmaǵan.
Tergeý nátijesinde azamattardan «Zhana Business» JShS baqylaýyndaǵy shottarǵa túsken qarajattyń jalpy somasy 247,5 mln teńgeni quraǵan. Onyń 60 mln teńgesi depozittik shottarǵa ornalastyrylǵan.
Sot sanktsiiasymen 17 iPhone uialy telefonyna, sondai-aq Lamborghini Urus pen Lexus LX 600 kólikterin qosa alǵanda, 10 avtokólikke tyiym salyndy. Kúdiktilerge qatysty úiqamaq túrindegi bultartpaý sharasy qoldanyldy.
Qazirgi ýaqytta Erbolat Janábilov pen Elmira Tólegenova qylmystyq is materialdarymen tanysý ústinde. QR Qylmystyq-protsestik kodeksiniń 201-babyna sáikes ózge aqparat jariia etilmeidi.
