BQO juqpaly aýrýlar aýrýhanasynyń direktory Nadiia Ahmetova qyzmetinen ketti, dep habarlaidy "Ult aqparat".
Ol óz erkimen jumystan ketý jóninde eki márte ótinish túsirgen.
N.Ahmetovanyń sózine qaraǵanda, atalǵan mekemede óńirde koronavirýstyń keńinen taralýyna bailanysty birqatar kúrdeli másele týyndaǵan. Emdeý mekemelerinde ońtailandyrý júrýine bailanysty aýrýhanada tósek-oryndardyń teń jartysy qysqartylǵandyqtan, indet bastalǵannan-aq oryn jetispeýshiligi baiqalǵan. Buǵan meditsina qyzmetkerleriniń tapshylyǵy qosylǵan. Olardyń birqatary naýryzdan beri úiine barmai, qyzmet atqarsa, birqatary ózderi indet juqtyryp, emdelýde.
Qazirgi tańda dáriger bolyp jumys isteitin qyzy koronavirýspen aýyryp qalǵandyqtan, N.Ahmetovanyń ózi de úide oqshaýlanýda.
Budan buryn jazǵanymyzdai, óńirde koronavirýspen aýyrǵandardyń kóptigine bailanysty atalǵan mekeme naýqasqa tolyp qalyp, qalalyq kópbeiindi aýrýhanada qosymsha oryndar ashylýda.
Bul jóninde málim etken BQO densaýlyq saqtaý basqarmasynyń basshysy Bolatbek Qaiýpov Nadiia Ahmetovanyń qyzmetten nege ketkendigin aitty.
«Ol budan bir ai buryn qyzmetten ketý jóninde aryz jazǵan bolatyn. Ol kezde men sabyr etýin ótinip, ótinishin qanaǵattandyrmaǵan edim. Birneshe kún ekinshi márte ótinish túsirdi, bul joly qol qoidym. Bizdiń aramyzda talas-tartys bolǵan joq. Bári de jumys babynda bolyp, sheshilip jatty. Osyndai qiyn jaǵdaida jumys isteýdiń ońai emestigin túsinemin. Qazirgi kezde direktordyń mindetin ýaqytsha basqa adam atqarýda», dedi B.Qaiýpov.
