Batys Qazaqstan oblysynda jańa týǵan sábiin paketke salyp, ájethanaǵa tastaǵan qyzǵa qatysty sot úkimi shyqty, dep habarlaidy "Ult aqparat".
Qaztalov aýdandyq №2 sotynyń úkimimen Oraldaǵy kolledjderdiń birinde oqityn, Jańajol aýylynda turatyn 19 jastaǵy qyz QR QK 100-babyna sáikes aiypty dep tanylyp, onyń eki jylǵa bas bostandyǵy shekteldi.
Sot talqysynda anyqtalǵanyndai, qyz ótken jyldyń qyrkúiek aiynda tanys jigitinen júkti bolyp qalǵanyn bilgen. Alaida bul jóninde ata-anasy nemese basqa adamdarǵa aitpaǵan. Sodan 23 qarasha kúni úidiń senesinde tiri kúiinde er balany týǵan. Buǵan qobaljyp, qorqyp ketken ol sol jerde qaishymen balanyń kindigin kesken. Sosyn shaqalaqty tsellofan qapqa salyp, qora ishindegi dárethanaǵa salyp jiberip, jańa týǵan sábiin óltirgen.
Sottalýshy óziniń kinásin tolyq moiyndady. Qyzdyń sózine qaraǵanda, kezdesip júrgen jigitine qarasha aiynda telefon arqyly júkti bolyp qalǵanyn jazyp jibergende, ol «bala kerek emes, ne isteseń, óziń bil» dep jaýap bergen. 23 qarasha kúni túski tamaqtan keiin anasy dúkenge ketken. Ákesi men eki baýyry óz bólmelerine kirip, demalyp jatyp qalǵan.
Sábiin týyp, dárethanaǵa tastaǵannan keiin úige kirip, óz bólmesine baryp jatyp qalǵan. Alaida anasy kelgennen keiin aýrýhanaǵa aparýyn ótingen. Aýrýhanada barlyq jaǵdai belgili boldy.
Qyz qylmys jasaǵanyna ókinetinin bildirip, sottan qatań jazalamaýdy surady.
Saraptamaǵa sáikes 8-8,5 ailyq sábi tiri týǵan.
Sot úkim taǵaiyndaǵan kezde sottalýshynyń kinásin tolyq moiyndaǵanyn, materialdyq jáne otbasylyq jaǵdaiyn, buryn sottalmaǵanyn, jastyǵyn eskerdi.
BQO sotynyń baspasóz qyzmetinen túsken málimetke qaraǵanda, úkim zańdy kúshine engen joq.
