Batysqazaqstandyq memlekettik qyzmetshiler jańajyldyq korporativterdiń ornyna qaiyrymdylyq jasady, dep habarlaidy "Ult aqparat".
Oblys ákiminiń bastamasymen qolǵa alynǵan «Qaiyrymdylyq jasasań, qaiyrymyn óziń kóresiń» atty qaiyrymdylyq is-sharasy aiasynda 14 mln astam teńge jinaldy.
Osy qarajatqa azyq-túlik sebetteri satyp alynyp, kópbalaly jáne az qamtylǵan otbasylarǵa taratylatyn bolady.
Búgin «El yrysy» bazary aýmaǵynda bastapqy 200 sebet taratyldy.
Oblystyq jumyspen qamtýdy úilestirý jáne áleýmettik baǵdarlamalar basqarmasynyń basshysy Altai Qulqaevtyń aitýynsha, eldegi epidemiologiialyq jaǵdaiǵa bailanysty jańajyldyq keshterdi ótkizý toqtatylǵan bolatyn. Oblys ákimdiginiń qoldaýymen qaiyrymdylyq is-sharasyna departamentter men basqarmalar qyzmetkerleri belsendi atsalysty. Jyl sońyna deiin jalǵasatyn is-shara aiasynda shamamen myńǵa jýyq otbasyny qamtý kózdelýde.
BQO politsiia departamentiniń resmi ókili Bolatbek Belgibekov mundai is-sharalardan tártip saqshylary da qalys qalmai, júieli ún qosyp kele jatqanyn, bul joly 8 otbasyǵa kómek kórsetilgenin jetkizdi.
Oblystyq kásipkerlik jáne indýstrialdyq-innovatsiialyq damý basqarmasy basshysynyń orynbasary Maqsat Qulanbaevtyń sózine qaraǵanda, bul, bir jaǵynan, az qamtylǵan, kópbalaly otbasylardy qoldaý. Ekinshi jaǵynan, azyq-túlik sebetine salynatyn ónimder jergilikti kásiporyndardan satyp alynady. Iaǵni, otandyq ónim óndirýshilerge de qoldaý jasalyp otyr.
