Batys Qazaqstan oblysynda qarasha aiy bastalǵannan beri monitoringtik toptar 41 nysanda shekteý sharalary buzylǵanyn anyqtady, dep habarlaidy "Ult aqparat".
BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń óńirlik kommýnikatsiialar qyzmeti alańynda ótken brifingide málim etkenindei, 12 kún ishinde QR Ákimshilik quqyqbuzýshylyq kodeksiniń 425-baby 1-bóligine sáikes 63 ákimshilik hattama toltyryldy.
Sonyń ishinde 35-i otbasylyq toi-dýman, sadaqa jasaǵandarǵa, 24-i jeke qorǵanysh quraldaryn qoldanbaǵan turǵyndarǵa qatysty boldy.
Osy buzýshylyqtar boiynsha 21 mln astam teńge aiyppul salyndy.
N.Mustaevtyń sózine qaraǵanda, oblysta koronavirýsqa bailanysty epidemiologiialyq ahýal kúrdelenip barady. Apta saiyn indettiń orta eseppen 59 paiyzǵa ósýi baiqalady.
1-12 qarasha aralyǵynda barlyǵy 358 adam koronavirýs juqtyrsa, sonyń 252-si nemese 70,3 paiyzy Oral qalasynyń úlesine tiedi. Sondai-aq Báiterek aýdanynda – 41, Bórlide – 25, Terekti men Shyńǵyrlaýda – 10-nan, Jańaqalada – 5, Jánibekte – 4, Qaratóbe, Syrym, Qaztalovta – 3-ten, Bókei ordasy men Aqjaiyqta bir-birden adamnyń indetpen aýyrǵany tirkeldi.
Qarasha aiynda memlekettik shekaradan 8559 adam ótse, sonyń 1688-i – jolaýshylar. Anyqtamasyz ótken 159 jolaýshynyń tórteýinen koronavirýs tabyldy. Sol sekildi halyqaralyq júk tasymaldaityn 2962 júrgizýshi ótse, sonyń 1577-sinde anyqtama joq bolyp shyqty. Sonyń ishinde 14 júrgizýshiniń indet juqtyrǵany belgili boldy.
«Osy aida oblys boiynsha 15747 adam (indet bastalǵannan beri – 179464) zerthanalyq tekserýden ótti. Kúni búgin óńir PTR diagnostikasy úshin 32646 zertteýge arnalǵan 652 test júiesimen qamtamasyz etilgen», dedi Nurlybek Mustaev.
