Volodarka aýylyna aparatyn jol. BQO, Báiterek aýdany, 2021 jyl.
Batys Qazaqstan oblysynda halyqqa óz esebinen jóndeýge tyiym salynǵan aýylǵa kireberistegi jol sol kúiinshe jóndelmei qalǵan, dep habarlaidy Azattyq.
Oblys ortalyǵy Oraldan jaqyn ornalasqan Volodarka aýylyna kirme joldy osy jazda halyq ózi jóndeýge tyrysqan. Turǵyndardyń josparyn estigen bilik oqiǵa ornyna arnaiy tehnikany jiberip, oi-shuńqyrlardy biteýge ýáde bergen. Artynsha ol jaqqa ekinshi sortty asfaltty ákelip, oi-shuńqyrlaryn biteýge tyrysqan.
Sodan beri eki ai ótti. Biraq turǵyndardyń sózinshe, jol oi-shuńqyry kóp sol báz-baiaǵy qalpyna túsken. Al halyqqa ony jóndeýge tyiym salǵan.
— Shilde aiynda bizge jol jóndeýge tyiym salǵannan keiin sol jaqqa tehnika kelip, barlyq shuńqyrlardy ekinshi sorttaǵy asfaltpen bitegen boldy. Biraq jol sapasyz jóndelgendikten, qazir jolda shuńqyr kóp, — deidi aýyl belsendisi Vera Ivanova.
Onyń aitýynsha, jergilikti bilik jol jóndeý jobasyn tek kelesi jyly qarastyratynyn aitqan.
— Ákimdikke hat jazǵannan keiin bizge jol jóndeý jobasy tek kelesi jyly ǵana josparǵa enetinin aitty. Onda da joldyń naqty qashan jóndeletini belgisiz. Maǵan jol jóndeýge aqsha jinama, áitpese ákimshilik jaýapqa tartylasyń dep eskertti, — deidi Vera Ivanova.
Aýdandyq turǵyn úi-kommýnaldy sharýashylyq bóliminiń Azattyqqa jibergen jaýabynda bilik ókilderi "jazda jolǵa jóndeý júrgizilgenin" atap ótedi. Buǵan deiin ákimdik jazdaǵy "remonttyń" biýdjet esebinen júrgizilgenin aitqan. Bul jolǵy jaýabynda jazǵy jóndeý jumystary jeke "ASFA" firmasynyń demeýshiligi arqyly júzege asyryldy dep jazylǵan. Onda jóndeý jobasynyń nobaiy kelesi jyly ázirlenetini kórsetilgen.
Volodarka aýylynyń turǵyndary jol jóndeýdi biyl maýsymda bastaǵan. Onyń aldynda turǵyndar aýdan ákimdigine talai ret baryp, shaǵymdanǵan. Aqparatqa qaraǵanda, aýyl joly shamamen 30 jyl buryn salynǵan, sodan beri birde-bir ret jóndeý kórmegen.
