Batys Qazaqstan oblysynda jyl basynan beri 133,8 myń tonna dándi daqyldar, júgeri jáne nut ónimderi shetelge jóneltildi, dep habarlaidy QazAqparat.
BQO aýyl sharýashylyǵy basqarmasy egin sharýashylyǵy bóliminiń basshysy Qýanyshqali Esimovtiń aitýynsha, sonyń ishinde Ózbekstanǵa – 110,4 myń tonna, Aýǵanstanǵa – 11,5 myń tonna, Tájikstanǵa 7,8 myń tonna ónim eksporttaldy.
Biylǵy 11 aidyń ishinde Aýǵanstanǵa – 14 myń tonna, Reseige – 9,8 myń tonna, Túrkmenstanǵa 5,2 myń tonna Aq Jaiyq astyǵy jóneltildi.
Sondai-aq 56,2 myńnan astam tonna kúnbaǵys eksporttalsa, sonyń basym bóligi, iaǵni 35 myń tonnasy Ózbekstanǵa, 5 myń tonnasy Qytaiǵa, 2,5 myń tonnasy Tájikstanǵa ketti.
Qytai batysqazaqstandyq «Terekti mai zaýytynan» 2,5 myńnan astam tonna kúnbaǵys maiyn satyp aldy.
Oblysta eginmen 600 sharýashylyq ainalysady, sonyń ishinde 200-den astamy kókónis ósirýge den qoiǵan. Biyl 228 myń gektarǵa – dándi daqyldar, 118,1 myń gektarǵa – maily daqyldar, 4,1 myń gektarǵa – kartop, 3331 gektarǵa kókónis egildi.
Qýanyshqali Esimovtiń sózine qaraǵanda, biyl astyq óndirýshiler úshin qolaily jyl boldy. Tótenshe jaǵdai men karantindik sharalarǵa qaramastan, fermerler kedergisiz júrip-turdy. Janar-jaǵar maimen, qosalqy bólshektermen qamtýda irkilis bolǵan joq. Sonyń nátijesinde kóktemgi egis jumystary, kúzgi jiyn-terin ýaqtyly atqarylyp, dándi daqyldardyń jalpy ónimi 292 myń tonnaǵa jetti. Bul ótken jylǵydan 30 myń tonnaǵa artyq. Ár gektardan alynǵan ortasha ónim ótken jylǵydan (9,9 tsentner) 3 tsentnerge ósip, 12,9 tsentnerden ainaldy. Ásirese, kúzdik bidaidyń ár gektaryna 24,8 tsentnerden keldi. Bul kúzdik bidai egýdiń tiimdiligin kórsetedi.
Diqandar aldaǵy jyldyń óniminen de úmitti. Sondyqtan biyl jospardaǵy 86 myńnyń ornyna 95,2 myń gektar alqapqa kúzdik bidai egildi. Ótken jyly egin sharýashylyqtary 81 myń gektarǵa kúzdik bidai sepken edi.
«Biyl álemdik naryqta aýyl sharýashylyǵy taýarlaryna qolaily baǵa qalyptasqanyn aita ketý kerek. Fermerler kúzdik bidai men kúnbaǵysty kóbirek egýdiń paidasyn kórdi. Ótken jyly kúzde maily daqyldardyń ár tonnasyna bastapqy baǵa 70 myń teńge bolsa, biyl 140 myń teńgege jetti. Dándi daqyldarǵa da baǵa 70 myńnan 95 myń teńgege deiin ósti. Bul batysqazaqstandyq taýar óndirýshilerge óz ónimderin shetelge tiimdi baǵamen satýǵa múmkindik berdi», dedi Qýanyshqali Esimov.
