"Býzgýl Aýrým" JShS quryltaishysy Baqytjan Kenjebaev qundy qaǵazdardy ornalastyrýdan túsken jáne kompaniianyń depozit esepshotynda jatqan bes milliard teńge somasyndaǵy qarajatty óz maqsatyna jaratqan. Bul týraly kaz.tengrinews.kz redaktsiiasynyń resmi saýalyna bergen jaýabynda UQK ókilderi aityp otyr.
Qazirgi ýaqytta quqyq qorǵaý organdarynyń BJZQ men "Býzgýl Aýrým" JShS-nyń arasyndaǵy kelisimdi tergep jatqany belgili. Onyń aiasynda Biryńǵai jinaqtaýshy zeinetaqy qory altyn qazý kompaniiasynan jyldyq mólsheri 19 paiyz bolatyn qundy qaǵazdardy óz esebinen satyp alǵan. Bul kelisimge Ulttyq bank basshylyǵy kúdikpen qaraǵan, nátijesinde qarjy retteýshisiniń ókilderi quqyq qorǵaý organdaryna aryz túsirgen. BJZQ ókilderi bolsa birinshi kezekte zeinetaqy aktivteriniń investitsiialyq portfelinde "Býzgýl Aýrým" JShS-nyń qundy qaǵazdary joq ekenin aityp, túsindirdi.
"Qolda bar málimet boiynsha, bul kelisim "BJZQ" AQ basqarma tóraǵasy Rýslan Erdenaevtyń yqpalymen jasalǵanǵa uqsaidy, ol "BJZQ" AQ investitsiialyq komitetiniń jetekshisi bola otyryp, qordyń "Býzgýl Aýrým" JShS qundy qaǵazdaryn satyp alýy úshin osy máseleni jyldamdatyp sheshý maqsatynda qolastyndaǵylarǵa yqpal etken. Al qarjy qaterleri basqarmasynyń basshysy Musa Bahtov osy kelisim boiynsha qaitalama qorytyndy toltyryp, onda "Býzgýl Aýrým" JShS qundy qaǵazdaryn satyp alýda qater joq dep kórsetken. Óz kezeginde "Býzgýl Aýrým" JShS direktory Azat Naizaǵarin osy JShS-dan qor birjasyna jáne "BJZQ" AQ-ǵa qundy qaǵazdardy ornalastyrý protsesinde birqatar jalǵan qujattarǵa qol qoiyp ótkizgen", - dep pikir bildirdi UQK ókilderi.
Vedomstvodaǵylardyń aitýynsha, "BJZQ" AQ men "Býzgýl Aýrým" JShS arasyndaǵy osyndai kelisim jasaý arqyly 100 paiyzǵa memlekettik mekeme bolyp sanalatyn qordan 5 milliard teńge somasynda qarajat jymqyrylǵan.
Eske salaiyq, 2016 jyldyń 21 jeltoqsanynan bastap QR Ulttyq bankiniń qatysýymen "Biryńǵai jinaqtaýshy zeinetaqy qory" Aktsionerlik qoǵamynyń qyzmetine tekseris júrgizilgen bolatyn. Sol kezde tekseristiń BJZQ aktsionerlik qoǵamynyń menshikti aktivterdi investitsiialaýǵa qatysty jasalǵan operatsiialary boiynsha júzege asyrylyp jatqany aitylǵan edi. "BJZQ" AQ-tyń menshikti aktivteri onyń kapitaly jáne sharýashylyq qyzmetiniń nátijeleri esebinen qalyptastyrylady eken. "BJZQ" AQ menshikti aktivterdi derbes basqarady", - degen edi banktegiler.
Al 9 qańtarda BJZQ basshylyǵy qamaýǵa alynǵan bolatyn."Olar Jańa jyldyń aldynda qamaýǵa alynǵan. Aty-jónderin bilmeimin, biz olardy atamadyq. Jetekshi men orynbasarlarynyń biri qamaýǵa alynǵan", - degen edi QR Ulttyq bankiniń qarjy qyzmetteri tutynýshylarynyń quqyǵyn qorǵaý departamentiniń direktory Aleksandr Terentev.
Sondai-aq, búgin BJZQ isi boiynsha qamaýǵa alynǵandardyń tizimi jariialanǵan boldy. Keiinirek BJZQ basqarma tóraǵasynyń advokaty istiń mán-jaiyn aityp bergen edi.
