Búgin Almatyda «Jańa Qazaqstan» forýmy resmi túrde óz jumysyn bastaǵanyn jariialady. Bul týraly arnaiy baspasóz máslihatyn ótkizgen «Jańa Qazaqstan» músheleri málimdedi. Jańa uiymnyń músheleri saiasatker Ámirjan QOSANOV, saiasattanýshy Rasýl JUMALY men Aidos SARYM jýrnalisterdiń suraqtaryna jaýap berdi.
«Jańa Qazaqstan» — qoǵamdyq birlestik jetekshileri, saiasatkerler, quqyq qorǵaýshylar, jýrnalister men sarapshylardan quralǵan yntymaqtastyq. Hám intelektýaldy qoǵamdyq alań. Olar eldegi saiasi, ekonomikalyq, idealogiialyq, aqparattyq monopoliiaǵa qarsy kúrespek. Bilik tranzitiniń taiap qalǵandyǵyn aitqan qoǵam qairatkerleri ekinshi prezidenttiń taǵaiyndalmai sailanýyna buqara bolyp áser etýimiz kerek deidi.
- Damýdyń eki joly bar. Órkenietti jáne revoliýtsiialyq jol. Biz birinshi joldy tańdaimyz. Evropa men AQSh-ta saiasi báseke bolǵandyqtan memleket qýatty. Kóshege shaqyratyn radikaldy urandardy kótermeimiz. Oi jarystyramyz. Barlyq qoǵamdyq-saiasi oqiǵalarǵa saraptama jasap, baǵa beremiz,- deidi saiasattanýshy Rasýl Jumaly.
Zań aiasynda jumys jasaimyz degen «Jańa Qazaqstan» forýmy jýyrda qoǵamdyq uiym retinde tirkelýge yqylasty eken. Eger bizdi tirkemese bul biliktiń ózine syn deidi qoǵam qairatkerleri. Qoǵamda «Jańa Qazaqstan» qýǵyndaǵy saiasatker Muhtar ÁBLIaZOVTYŃ QDT-na (DVK) balama retinde Aqordanyń yqpalymen quryldy degen sóz bar. Osyǵan orai Ámirjan Qosanov jaýap berdi.
- Bizde bir uiym qurylsa ony shetten ia bolmasa Aqordadan qarjylandyrady degen áńgime shyǵady. Bizdiń artymyzda turǵan eshkim joq. Muhtar Ábliazovtyń óz joly bar. Qazaqstannyń bolashaǵy jaily óz kózqarasy bar. Kezinde M. Ábliazov, Ǵ. Jaqiianovtar qamalǵanda olardy qoldaý shtabynda boldym. Áleýmettik jelide men jaily negizsiz áńgimelerdi aitqasyn ony men de synadym. 27 jyldan beri kóp nárse ózgerdi. Qoǵam qazir oiaý. Osynda otyrǵan azamattardyń barlyǵyn turmystary jaman emes. Mysaly Briýselge óz qarajatymyzǵa baryp keldik. Bizdi satyp alýǵa bilik pen oligarhtardyń aqshasy jetpeidi, — dedi Ámirjan Qosanov.
Derekkóz: "Jas Alash"
