QR Qarýly Kúshteri Áýe qorǵanysy kúshteriniń bas qolbasshysy Nurlan Ormanbetov Qaraǵandydaǵy áskeri ushaq apatyna sebep bolýy múmkin nusqalardy atady, dep habarlaidy "Ult aqparat".
«Bizde eski aviatsiialyq tehnika degen uǵym múlde joq. Sebebi áskeri tehnikalar josparly túrde tehnikalyq tekseris pen kúrdeli jóndeýden, reglamenttik jumystardan, modernizatsiiadan ótkizilip turady. Qorǵanys ministrliginiń áýe kúshterin damytyp, jaraqtandyrý boiynsha keshendi jospary bar. Ol aviatsiialyq oqiǵalar qaýpin barynsha azaitýy tiis. Áýe kúshterin damytyp, jaraqtandyrý jospary jańa ári básekege qabiletti ushaqtarmen qamtamasyz etýdi de qarastyrady. Aviatsiialyq bólimderde júieli túrde áýe oqiǵalarynyń aldyn alý sharalary júrgiziledi. Atalmysh sharaǵa aviatsiialyq parktiń jaǵdaiy men analizi, parktiń senimdiligin arttyrý úshin tiisti jumystardyń bárin atqarý, ushý barysynda áýe tehnikasynan aqaý shyǵýyna jol bermeý sekildi mańyzdy jumystar kiredi», - dedi Nurlan Ormanbetov OKQ-da onlain rejimde ótken baspasóz máslihatynda.
Áýe qorǵanysy kúshteriniń bas qolbasshysynyń aitýynsha áskeri ushqyshtar jyl saiyn qaýipsizdik sharalaryna bailanysty konferentsiialarda bas qosady. Ol jiynda ushý saparlarynyń mańyzdy máseleleri talqylanady.
«BAQ-ta qazir ushaq apatyna bailanysty ártúrli joramal jazylyp júr. Alaida ol boljamnyń bári durys emes dep aitar edim. Qazir onyń apatqa ushyraý sebebin anyqtaý maqsatynda arnaiy komissiia jumys júrgizip jatyr. Komissiia áýe tehnikasynyń apatyna ne sebep bolǵanyn zerttep, nusqalardyń bárin taldap, apattyń sebebin anyqtaityn qorytyndy shyǵarady», - dedi ol.
Nurlan Ormanbetov áýe tehnikasynyń apatqa ushyraý jaǵdaiyna qatysty birshama nusqanyń qarastyrylyp otyrǵanyn aitady.
«Onyń ishinde áýe tehnikasynan ushý kezinde aqaý shyǵýy, syrtqy faktorlardyń yqpaly, sondai-aq adam faktory sekildi nusqalar da zerttelýde. Atalmysh ushaqtyń ekipajy óte saýatty áreket ete bildi. Bári jaily aiaqtalýy úshin der kezinde sharalardy qolǵa alyp, aviatsiialyq tehnikany saqtap qalýdyń bar amalyn qarastyrdy. Áitse de osyndai apat oryn alyp otyr. Komissiianyń resmi qorytyndysyn kútseńizder dep ótinemiz. Ol týraly qosymsha aldaǵy ýaqytta habarlaimyz», - dedi ol.
Eske sala ketsek keshe Qaraǵandy oblysynda áskeri ushaqtyń apatqa ushyraǵany týraly habarlaǵan edik. Qulaǵan ushaqtan eki sarbaz zardap shekti.
