Qasym-Jomart Toqaev jetekshi nemis kompaniialary ókilderine arnalǵan iskerlik dastarhan basynda Qazaqstannyń ekonomikalyq jáne investitsiialyq áleýeti týraly áńgimeledi.
Qazaqstan Prezidenti Eýropa odaǵyna múshe memleketterdiń ishinde Germaniianyń Qazaqstan úshin negizgi saýda-ekonomikalyq seriktes ekenin atap ótip, elimizdiń yntymaqtastyqty damytýǵa nietti ekenin jetkizdi.
– Qazaqstan Prezidenti retinde Germaniiadan elimizge investitsiia men kásipkerlerdi tartý jáne biznes ókilderiniń ózderin qaýipsiz sezinip, tabysty damýy úshin bar kúsh-jigerimdi jumsaimyn. Biz nemis kásipkerleri úshin erekshe jaǵdai jasaýǵa daiynbyz, – dedi Memleket basshysy.
Prezident Qazaqstannyń óz standarttaryn jaqsartýǵa, bolashaqta Ekonomikalyq yntymaqtastyq jáne damý uiymynyń tolyqqandy múshesi bolý úshin zańnamalardy osy uiym deńgeiine deiin kóterýge umtylatynyn málimdedi. Sonymen qatar Qasym-Jomart Toqaev Qazaqstannyń qolaily geografiialyq jaǵdaiy men ornyqty syrtqy ekonomikalyq saiasaty sheteldik investorlar úshin zor múmkindikterge jol ashatynyn aitty.
– Qytaimen, Reseimen jáne Ortalyq Aziia elderimen qarym-qatynasymyz óte jaqsy. Biz Shyǵys pen Batys arasyndaǵy mańyzdy kólik haby bolyp tabylamyz. Barlyq transqurlyqtyq baǵyttaǵy joldardyń 70 paiyzy Qazaqstan arqyly ótedi. Halyqaralyq «Batys Eýropa – Batys Qytai» dálizi júk tasymalyna ketetin ýaqytty qysqartýǵa múmkindik beredi. Biyl Qytaidyń Sian qalasynan Germaniiaǵa tasymaldanatyn júk nebári on kúnde jetkizilip, rektordtyq kórsetkishke jetti, – dedi Prezident.
Onyń aitýynsha, «Volkswagen», «Mann», «Siemens», «Knauf», «Bayer», «METRO» sekildi jetekshi nemis kontsernderi Qazaqstanda belsendi jumys istep jatyr. «Heidelberg Cement» jáne «Linde Group» korporatsiialary el ekonomikasyna iri kólemde qarjy quiyp, tabysty ekonomikalyq yntymaqtastyqtyń jarqyn mysaly bolyp otyr.
Qasym-Jomart Toqaev nemis kásipkerlerin agroónerkásip kesheni, joǵary tehnologiialar men tsifrlandyrý salalaryndaǵy jobalardy júzege asyrýǵa, sondai-aq, «Astana» halyqaralyq qarjy ortalyǵynyń jumysyna atsalysýǵa shaqyrdy.
Is-sharaǵa 20-dan astam nemis kompaniiasynyń jetekshileri qatysty. Atap aitqanda, «WILO», «CLAAS Group», «SMS Holding GmbH», «Schaeffler AG», «Airbus Defence and Space», «Linde AG», «Mangold Consulting GmbH», «Herrenknecht AG», «Knorr-Bremse AG», «Euler Hermes», «Siemens Healthineers», «John Deere», «Deutsche Bank AG», «Tönnies Holding», «BAUER COMP Holding» jáne t.b.
Nemis isker toptarynyń ókilderi Qazaqstan naryǵynda jumys isteý tájiribelerimen bólisip, aldaǵy josparlary men usynys-tilekterin aitty.
– Biz úshin sizben áńgimelesý zor ǵanibet. Sizdiń búgingi saparyńyz saiasi qatynastarymyzǵa ǵana emes, ekonomikalyq bailanystarymyzǵa da oń yqpal etetinine senimdimiz. Qazaqstan úshin Germaniia biznesi senimdi seriktes ekenine sendiremin. Bolashaq yntymaqtastyǵymyz ben Qazaqstan ekonomikasyndaǵy nemis investitsiiasyn arttyrý úshin bizge zor múmkindikter ashylady dep esepteimin, – dedi «WILO» kompaniiasynyń basshysy Oliver Germes.
Kezdesý sońynda Qasym-Jomart Toqaev investitsiialyq jobalardy nemis biznesiniń qatysýymen júzege asyrýda yntymaqtastyq ornatýǵa Qazaqstannyń daiyn ekenin málimdedi.
– Biz barlyq máseleniń oń sheshilýine kómektesýge múddelimiz. Búgingi sizderdiń baiandamalaryńyzda aitylǵan jobalar Úkimetimizdiń erekshe nazarynda bolady. Qazaqstanda sizderdiń biznesterińiz júzege asyryp jatqan birlesken jobalarǵa qoldaý kórsetýge basa mán beremiz, – dedi Memleket basshysy.
