El jastaryn ortaq múddege uiystyrǵan «Jas Otan» Jastar qanatynyń IV Sezi de óz máresine jetti. Bul joly biz burynǵy júieden arylyp, búginginiń ozyq úlgisine basymdyq berdik. Zamanaýi trendter men tehnologiialardy keńinen qoldanyp, kreativti, jańa formatta ótkizýdi uiǵardyq. Sol arqyly Sezdi utqyr oilar men utymdy pikirlerdiń alańyna ainaldyrýdy kózdedik. Kópshiliktiń pikiri men bergen baǵasyn eskersek, bul oiymyz júzege asqan siiaqty.
Biylǵy Sezde jastarǵa meilinshe erkindik berildi. Esesine olar qoǵamdaǵy ózekti máselelerge qatysty óz kózqarastaryn ashyq bildirip, olardy tiimdi sheshýdiń joldaryn usyndy. Kóptegen tyń ideialar men igi bastamalar aityldy. Shyny kerek, jastardyń munshalyqty belsendiligi meni erekshe qýanyshqa bóledi.
Men shyn máninde Otanymyzdy odan ári kórkeitý úshin aianbai eńbek etýge daiyn jańa, jas, zaman talaptaryna beiimdelgen býynnyń ósip kele jatqanyn kórdim.
Solardyń arasyndaǵy taǵdyrdyń qatal synyna tap bolsa da esh moiymai, ómirge degen qushtarlyǵymen ózgelerge dem berip júrgen paralimpiada oiyndarynyń júldegeri Serik Esmatov, nebary 17 jasynda IT tehnologiia salasynda biik belesterdi baǵyndyrǵan, birneshe innovatsiialyq jobanyń avtory Ivan Krepak, jas ta bolsa ata kásipti qolǵa alyp, mal sharýashylyǵynda tasyn órge domalatyp otyrǵan kásipker Baimyrza Adambek siiaqty belsendi jastarymyz kemel keleshektiń kepili. El erteńine beijai qaramaityn osyndai jalyndy jastardyń jasotandyq ekeni de kóńilge qýanysh uialatady.
Biz bul Sezd arqyly elimizdegi jastar saiasatyna tyń serpin berip, jańǵyrýdyń jańa deńgeiin aiqyndadyq dep esepteimin. Endigi kezekte osy baǵyttaǵy jumysymyzdy jandandyryp, bilim, ǵylym, innovatsiia arqyly jańa álemge umtylǵan jastarymyzǵa jan-jaqty qoldaý kórsetýimiz kerek. Bul rette «Nur Otan» partiiasy tarapynan Sezd barysynda usynylǵan árbir joba nazarǵa alynyp, tiisti jumystar júrgiziletinin aitqym keledi.
Máýlen Áshimbaevtiń feisbýktegi jazbasynan
