Almaty qalasynyń ákimi Baqytjan Saǵyntaev «Zerdeli» yqshamaýdanyndaǵy kópqabatty úilerdiń irgetasyn nyǵaitý barysymen tanysty, dep habarlaidy "Ult aqparat".
Qala ákimi Instagram paraqshasynda «Zerdeli» yqshamaýdanynyń turǵyndaryn tolǵandyrǵan másele nazardan tys qalmaǵanyn jazdy.
«QazQSǴZI mamandarynyń qorytyndysy boiynsha 2020 jyly 7 úidiń irgetasy nyǵaityldy. Biyl 10 úidi nyǵaitý josparlanyp otyr. Barlyq jumysty onyń tehnologiiasy, qurylys normasy men talaptaryn saqtai otyryp júrgizýdi tapsyrdym. Budan keiin 13 aýlanyń qasbeti retke keltirilip, balalarǵa arnalǵan oiyn men sport alańdary, oryndyqtar men jaryq júiesi ornatylady», - dep jazdy Saǵyntaev.
Qala ákiminiń sózinshe, turǵyndardyń ótinishimen aýla men úi mańyndaǵy aimaqty retke keltirý máselesi sheshimin tabatyn bolady.
«Zerdelide» turǵyn úilerge janasyp jatqan 8 jer telimi alynady.
«Sondai-aq «Nurkent» yqshamaýdanynda № 43 pen №72 úidiń arasyndaǵy jer telimine biik úi turǵyzbaq bolǵan menshik iesinen bul jer tárkilendi. Atalǵan jerde balabaqsha boi kóteredi», - dep atap ótti B. Saǵyntaev.
Ákim jumys sapary kezinde Alataý aýdanynda «Nurly jer» baǵdarlamasy aiasynda salynyp jatqan «Alataý siti» turǵyn úi kesheninde boldy.
Sondai-aq shahar basshysy Túrksib aýdanyndaǵy «Qairat» yqshamaýdanynda ornalasqan TK qurylys alańdaryn aralady.
Munda 1,5 myń oqýshyǵa arnalǵan mektep, 280 oryndy balabaqsha men 500 kelýshige arnalǵan emhana qurylysy qarastyrylǵan.
Keshendi qurylys jumystarynyń arqasynda turǵyndar qajetti áleýmettik nysandarmen qamtamasyz etiledi.
Biz buǵan deiin «Zerdeli» shaǵynaýdanynda ornalasqan barlyq kópqabatty 32 turǵyn úige tekserý júrgizý úshin 312 million teńge baǵyttalǵanyn jazǵan bolatynbyz.
Eske salaiyq, 2019 jyly Alataý aýdanyndaǵy «Zerdeli» shaǵyn aýdanynyń turǵyndary úileriniń qisaiǵanyn aityp, dabyl qaqqan bolatyn.
Keiin Baqytjan Saǵyntaev qisaiǵan úidiń turǵyndarymen kezdesip, ákimdik olardy kóshirýge daiyn ekenin jetkizdi.
