- Aǵymdaǵy jyldyń qorytyndysy boiynsha, 9,6 mln. sharshy metr turǵyn úi paidalanýǵa beriledi.
Bul týraly búgin Úkimet otyrysynda QR Ulttyq ekonomika ministri Qýandyq Bishimbaev málim etti, dep habarlaidy Ult.kz tilshisi «QazAqparat» agenttigine silteme jasap.
«2016 jyldyń qorytyndysyna arnalǵan boljamdy derekterge sáikes, 9,6 mln. sharshy metr turǵyn úi paidalanýǵa beriletin bolady. 2009 jyldan bastap halyqtyń turǵyn úimen qamtamasyz etilýi 14,8 paiyzǵa artyp, ótken jyly 21 sharshy metrdi qurady», - dep atap ótti ministr.
Osy rette ol Memleket basshysynyń tapsyrmasymen «Nurly jer» memlekettik baǵdarlamasynyń tujyrymdamasy ázirlengenin, onyń maqsaty turǵyn úi qurylysy salasyndaǵy barlyq resýrstardy bir baǵdarlamaǵa shoǵyrlandyrý bolyp tabylatyndyǵyn atap ótti.
«Tujyrymdamanyń basym baǵyttary mynalar: Birinshi, ipotekalyq qaryzdardy sýbsidiialaý arqyly ipotekalyq nesie berýdi qoldaý; Ekinshi, qurylys kompaniialary úshin qaryzdardy jabý jolymen jeke qurylys salýshylardy yntalandyrý; Úshinshi, Turǵyn úi qurylys jinaq bankiniń salymshylary jáne ákimdikterde kezekte turǵan azamattar úshin «revolverlik» qaǵidat boiynsha kredittik turǵyn úi qurylysynyń kólemin ulǵaitý; Tórtinshi, halyqtyń áleýmettik jaǵynan osal toptary úshin satyp alý quqyǵynsyz jalǵa beriletin turǵyn úidiń óńirlik qoryn qurý; Baǵdarlamanyń sońǵy baǵyty, memlekettiń jer ýchaskelerin berýi arqyly jeke turǵyn úi qurylysyn damytý», - dedi Bishimbaev.
Onyń atap ótýinshe, ipotekalyq kredit berý naryǵyn jandandyrý maqsatynda azamattarǵa ekinshi deńgeidegi bankter beretin ipotekanyń protsenttik stavkasynyń bir bóligin memlekettiń sýbsidiialaýy arqyly halyqtyń suranysyn yntalandyrý kózdelip otyr. Banktiń syiaqy stavkasy jylyna 17 paiyzdan artyq bolmaidy jáne 7 jyl ishinde sýbsidiialaý boljanady.
«Túpkilikti qaryz alýshynyń ipotekasyn 10 paiyzǵa deiin tómendetý úshin memleket syiaqy qunynyń 7 paiyzyna deiin jabýdy qamtamasyz etetin bolady. Búgingi kúni osy maqsatqa 2017 jylǵa arnalǵan respýblikalyq biýdjette 10 mlrd. teńge kózdelgen, bul 120 mlrd. teńge somasynda jeńildikti ipotekalyq qaryz berýge múmkindik beredi», - dedi ministr.
.jpeg)