Biyl elordada 40 myń bala bilim alatyn 15 mektep salynady. Bul týraly qala turǵyndarymen esep berý kezdesýinde elorda ákimi Altai Kólginov aitty, dep habarlaidy QazAqparat.
Onyń atap ótýinshe, Nur-Sultan ákimdigi mektep qurylysy boiynsha jumystardy júieli júrgizýde. 2021 jyly 2020 jylǵa qaraǵanda eki ese, 2019 jylmen salystyrǵanda tórt ese kóp oryn ashylady.
«Bilim sapasy men oǵan jaǵdai jasaýǵa mán berý óte mańyzdy. Turǵyndar sanynyń artýyna bailanysty mektepterdegi oqýshylarǵa oryn jetispeýshiligin qysqartý úshin jyl saiyn keminde 10 mektep salý kerek. 2020 jyly 2019 jylǵa qaraǵanda paidalanýǵa berilgen mekteper sany eki esege kóp. Bul 11 bilim mekemesi buryn mektep bolmaǵan turǵyn alaptarda salyndy. Ol jerlerde buryn balalar beiimdelgen ǵimarattarda oqyǵan. Jańa mektepter úsh aýysymdy mektepter sanyn 8-den 4-ke qysqartýǵa múmkindik berdi. Budan bólek, birqatar mektep qazandyq jylytýdan ortalyqtandyrylǵan jylytýǵa kóshirildi. Bul - mektepterge tek jylytý boiynsha jyl saiyn 100 mln teńge únemdeýge múmkindik beredi. 2021 jyly 15 mektep salatyn bolamyz. Bul 40 myń oryn ashýǵa múmkindik beredi», - dedi Altai Kólginov.
Elorda ákimdiginiń málimetinshe, 5 jyldyq keshendi jospar aiasynda 50 mekteptiń qurylysyn júrgizýge josparlanyp otyr. Mektep qurylysyna jeke investorlar da tartylatyn bolady.
