6 qazanǵa qaraǵan túni Bishkekte mitingide qaza bolǵan jigit 19 jasta bolǵan. Bishkektegi ulttyq gospitaldyń bas dárigeri Toktobai Maanaev Azattyqtyń Qyrǵyz qyzmetine jigittiń aýyr jaraqattanyp, aýrýhanada kóz jumǵanyn aitty.
- Marqumnyń eki aiaǵyn jarylǵysh zat julyp ketken. Qazir súiegin máiithanaǵa jetkizdik, - dedi Toktobai Maanaev.
Qyrǵyzstan densaýlyq saqtaý ministrliginiń málimetinshe, keshe, 5 qazannan beri 600-ge jýyq adam dáriger kómegine júgingen. 150 adam túrli jaraqatpen aýrýhanaǵa túsken, 13 adam reanimatsiiada jatyr.
5 qazanda Bishkekte parlament sailaýynyń aldyn ala qorytyndysyna narazy top miting ótkizip, keshke qarai sońy qaqtyǵysqa ulasqan. Politsiia parlament ǵimaraty men prezident ákimshiligi aldynda narazylarǵa rezeńke oq, kózden jas aǵyzatyn gaz, tútin qutylar qoldanǵan. Ondaǵan adam jaralanǵan.
Keiinirek arnaiy jasaq narazylarǵa kúsh qoldanýyn toqtatqan. Seisenbige qaraǵan túni demonstranttar Aq úi, parlament, memlekettik ulttyq qaýipsizdik komiteti ǵimaratyn basyp alǵan.
Oqiǵaǵa bailanysty videomálimdeme jasaǵan prezident Sooronbai Jeenbekov "ortalyq sailaý komissiiasyna sailaý kezindegi zańbuzýshylyqtardy tekserip, eger rastalsa, parlament sailaýynyń qorytyndysyn jaramsyz etýdi tapsyrǵanyn" habarlady.
4 qazanda Qyrǵyzstanda parlament sailaýy ótip, onyń aldyn ala qorytyndysy boiynsha úkimetshil úsh partiia jáne oppozitsiialyq bir partiia parlamentke ótken. Buryn "Jogorgý Keneshinde" bolǵan oppozitsiialyq partiialar 7 paiyzdyq mejeden óte almaǵan. Parlamentke óte almaǵan partiialar sailaý kezinde sailaýshyǵa aqsha berý siiaqty óreskel zańbuzýshylyqtar bolǵanyn aityp, elde qaitadan sailaý ótkizýdi talap etken edi.
