Elimizde bir adamǵa shaqqanda halyqtyń tabysy 59 myń teńgeden aspai otyr. Bul týraly QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat.
«Áleýmettik tólem jaiynda aityp jatyrmyn ǵoi. Onyń bári qajettilik. Bul kómekti memleket kórsetý kerek, mólsheri de kóp jaǵdaida jetkilikti emes shyǵar. Biraq, munyń bári neden týyndaidy? Jalpy, halyqtyń tabysy kóp emes, tómen. Mysaly, bizdiń saraptamaǵa sáikes, bir adamǵa shaqqanda halyqtyń tabysy 59 myń teńgeden aspai otyr. Onyń bári eń aldymen jalaqydan shyǵady. Sebebi jalaqy alyp júrgen azamattardyń arqasynda áleýmettik tólemder berip jatyrmyz. Kezinde Margaret Tetcher aitqandai, «Memlekettik biýdjet degen túsinik joq. Ol salyq tóleýshilerdiń aqshasy». Sondyqtan jumys istep júrgen azamattardy qoldaýymyz kerek. Biraq, bizde ókinishke qarai resmi statistika boiynsha ortasha jalaqy 200 myń teńgeden aspai tur», - dedi ol Ortalyq kommýnikatsiialar qyzmetinde onlain rejimde ótken halyqqa esep berý kezdesýi barysynda.
Alaida, ministrdiń aitýynsha, jumys istep júrgen azamattardyń 77 paiyzy 200 myń teńgeden de tómen jalaqy alady.
«Ár salada ártúrli. Aýyl sharýashylyǵynda 105 myń teńgeden aspai otyr. Ár oblysta da ártúrli. Mysaly, Solústik Qazaqstan, Jambyl, Túrkistan oblystarynda ortasha jalaqy 140-145 myń teńgeden aspaidy. Sondyqtan ne isteý kerek, ne isteldi? Birinshiden, 1 mln 300 myńdai qyzmetshi jumys isteitin biýdjettik salada maýsym aiynda jalaqy ortasha eseppen 30 paiyzǵa kóterildi. Osy jyldyń basynan dárigerlerge, muǵalimderge, áleýmettik, mádeniet salasy qyzmetkerlerine 25-ten 60 paiyzǵa deiin jalaqy ósti. Al jeke sektorda qalai bolýy kerek? Jeke sektorda 5,5 mln adam jumys istep jatyr. Bul jerde jalaqy mólsheri jumys berýshiniń quzyryna kiredi», - dedi ministr.
Onyń atap ótýinshe, ótken jyly Prezident úndeýinen keiin jeke sektordaǵy 1,2 mln adamnyń jalaqysy 32-33 paiyzǵa kóbeitilgen. Biraq, bul da búkil máseleni sheship otyrǵan joq.
«Jalaqy mólsherin belgileý jumys berýshiniń quzyrynda degenimizben eń tómengi jalaqy memleket tarapynan retteledi. Byltyrdan beri bizde eń tómengi jalaqy 42 500 teńgeni quraidy. Munyń ózi de az. Sondyqtan ony kóterý búgingi kúni óte mańyzdy. Qazirgi daǵdarys kezinde bul biýdjet shyǵyndaryn qajet etedi, qiyndaý bolady. Aldaǵy jyldary biz ony kezeńmen arttyramyz», - dedi Birjan Nurymbetov.
